Wild Cats Guardian Group/KJ74 a gana su di dos wega den e kampionato nobo di beisbòl dòbel A, esta den Liga Aqualectra. E kampion di Kòrsou ayera, djarason 25 di aprel, a nòkout Marchena Braves ku skor di 14-1.
E kompetensia lokal a kontinuá ayeranochi den Stadion Johnny Vrutaal. Esaki tabata e di seis enkuentro den e kampionato nobo, organisá pa Federashon Beisbòl di Kòrsou.
Wild Cats for di trempan a seya e viktoria riba Marchena Braves, ora ku den di dos inen e tim a skor na seis okashon. Den di kuater turno na bate e kampion di Kòrsou a agregá dos kareda mas: 8-0. Pa finalmente den di seis i shete inen e tim añadí respektivamente sinku i un kareda pa nòkout su oponente: 14-1. E úniko kareda di Braves a keda di skor den bòm di sinku entrada.
Picher ganadó a resultá Ruderly Manuel ku den 5 inen a pèrmití 1 kareda i 2 hit, miéntras ku ela ponchá 7 bateadó i duna 5 base por bola. Na su lugá a drenta den di 6 inen Carol Servania ku durante 1 inen no a pèrmiti kareda ni hit. E wega a keda salbá pa Gerlyon Jakob ku den 1 inen a pèrmití 1 hit.
E bateadónan di Wild Cats tabatin un bon anochi. Nan a dal 16 hit, di kual un homerun i tres doblete. Levi Carolus a dal e homerun. Ela tèrminá wega ku 2 hit den 5 turno i a empuhá 2 kareda, miéntras ku e mes a skor 2 biaha. E mihó bateadó tabata Luisgardo Alvarez ku a dal 3 hit den 4 turno i tambe empuhá 2 kareda. Alex Henrietta, Rojean Cleofa, Alexander Henrietta i Ardley Jansen tur a dal 1 hit den 1 turno na bate.
Picher Shurendy Mariano a sufri e derota. Den 2 inen di trabou ela pèrmití 6 kareda i 5 hit. Rylan Reina i Carlos Peña a dal 1 hit den 1 turno na bate.
E resultado ta nifiká ku Wild Cats tin 2 viktoria sin derota, miéntras di Marchena Braves tin 2 derota sin triunfo.
E kompetensia den Liga Aqualectra ta kontinuá awenochi, 26 di aprel, ku e enkuentro entre Sta Rosa Indians i Royal Scorpions. E Indjannan tin 1 triunfo sin derota, miéntras ku e Skòrpiunnan a pèrdè nan úniko wega. E enkuentro aki tambe ta tuma lugá den Stadion Johnny Vrutaal i ta kuminsá mitar di 8.
