E kampionato di futsal ta sigui hopi pèrtá den tantu divishon A komo B. E diferensia entre number 1 i number 2 i 3 den A ta apenas 1, miéntras ku den B esaki ta 2 punto.
Futsal Federation Curaçao ta organisá aktualmente e bueltanan preliminar dje kampionato lokal. E weganan ta keda hungá den sala Niels Liberia di stadion Odulio Willems den Suffisant.
Den kontinuashon dje kompetensia ayera, djarason 25 di aprel, tabatin dos wega den divishon A i un enkuentro den divishon B. Un total di 15 gol a keda di skor den e 3 weganan aki.
Pantera Negras ku e aña pasá a sali kampion den divishon B i a promové pa e divishon máksimo, a empatá na dos gol ku FC Don Bosco. E golnan di Don Bosco a keda anotá -un den kada tempu- pa Oscar Seco Vegas, miéntras ku Rignon Weynan tabata e goleadó pa Pantera Negras, tur dos ela skor den di dos tempu.
Den e otro wega den divishon A tabata FFCE United FC ku a triunfá ku skor di 4-3 riba FC RO Family. Despues di promé tempu e skor tabata 2-1 na fabor dje tim ganadó. Tres dje golnan di United FC a keda anotá pa Dannick Koeiman, miéntras ku Guisseppe Best a tuma e otro na su enkargo. E goleadónan pa FC RO Family tabata Raylon Eugenio (2x) i Sidney Leonora.
FC San Luca i FC FCF ta kompartí e promé lugá riba tabla di posishon den divishon A, ku 8 punto. San Lucas tin sinembargo un wega menos hungá. Tin sinku tim ta sigui ku 7 punto: FC Don Bosco, FC IGA, Ocean View FC, FC Babranis 01 i FFCE United FC.
Den divishon B e tim di FC Bandolino a gana ku skor di 3-1 di Fabarma FC i ku e viktoria aki e tim a subi bai ubiká su mes na di dos puesto riba e tabla di posishon ku 9 punto.
E golnan di FC Bandolino a keda di skor pa Tim vd Poel, Bert Hidding i Sjoerd Schepel. Pa e tim pèrdèdó a hinka gol Rugene Virginie.
FC Securitas Antias ainda ta okupá e promé lugá ku 11 punto, sigui awor pa FC Bandolino ku 9 punto i na di 3 puesto tin Sta Rosa Stars ku 8 punto.
E kampionato ta kontinuá awenochi, djaweps 26 di aprel, ku 3 wega i despues djasabra 28 di aprel ku atrobe 3 wega.
