Sport.cw

Sponsored by

Sponsored by

Sponsored by

Indians a flechá Scorpions

Sta Rosa Indians a logra su di dos triunfo den kontinuashon dje kampionato di beisbòl dòbel A, esta Liga Aqualectra. E tim a superá Royal Scorpions ayera, djaweps 26 di aprel 2018, ku skor di 9-2.

Federashon Beisbòl di Kòrsou (Febeko) ta organisá e kompetensia lokal. Te ainda a hunga seis enkuentro: 2 den Parke Heintje Kool i 4 den Stadion Johnny Vrutaal.

E Indjannan di Sta Rosa a sali mesora bai dilanti, anotando 1 kareda den bòm di promé inen. Nan a ampliá esaki den nan di kuater turno na bate ku 1 kareda mas: 2-0. den di seis e tim a añadí 2 kareda (4-0) mas pa asina sigurá e viktoria, ya ku e Skòrpiunnan a skor solamente 2 kareda: 1 den di shete i 1 den di ocho inen. Finalmente Sta Rosa a skor 4 kareda den bòm di ocho entrada: 9-2.

Picher ganadó tabata Jordan Lucas. Den 7 inen ela pèrmití 1 kareda i 6 hit. Ela ponchá 2 bateadó i duna 1 base por bola. Gionelo Jansen a relev’é den di 8 inen i a pèrmití den 2 entrada 1 kareda i 2 hit, miéntras ela ponchá 3 bateadó i duna 1 base por bola.

E mihó bateadónan pa Sta Rosa Indians tabata Riordan Windster, Rutherson Ustatia i Rudmichael Brandao. Windster a dal 3 hit den 5 turno na bate, empuhá 1 kareda i skor 3 biaha. Ustatia tabata bon pa 3 hit tambe den 4 turno i ela skor 1 kareda, miéntras ku Brandao a kaba ku 2 hit den 5 turno i ela empuhá 2 kareda.

Pa Royal Scorpions picher Gavanee Virginie a pèrdè e enkuentro. Den sinku inen ela pèrmití 2 kareda i 6 hit. E picher habridó aki a ponchá 3 bateadó i duna 4 base por bola.

Mihó bateadónan pa e Skòrpiunnan tabata Nisandro Cleofa, Juruengelo Tielman i Roderick Bernadina. Cleofa i Tielman a dal kada un 2 hit den 3 turno na bate, miéntras ku Bernadina a konektá 2 hit tambe pero den 4 turno.

E resultado di ayera ta nifiká ku Sta Rosa Indians tin awor dos viktoria sin derota, miéntras ku Royal Scorpions a pèrdè su dos enkuentronan ku ela hunga te ku awor.

E kampionato di beisbòl dòbel A ta sigui djasabra, 5 di mei, ku e wega entre Royal Scorpions i Sta Maria Pirates. E enkuentro aki ta planiá pa kuminsá mitar di 8 di anochi den Stadion Johnny Vrutaal na Rif, Otrobanda.

 

 

 

 

 

Translate »