Pabou den 3 World Series

Liga Pabou Junior League ta bira e di tres tim dje distrito Pabou ku ta rumbo pa weganan di World Series. Ganando ayera di Liga Pariba ku skor di 12 pa 2 den final, e ta sigui e timnan di Little League i Senior League ku anteriormente a klasifiká pa e kampionatonan mundial.

Liga Pabou anteriormente a dominá den weganan di selekshon i te ainda tambe den weganan regional. Den dos dje kampinatonan aki, Senior i Junior League, e final a bai entre e dos liganan di Kòrsou i Pabou no a duna Pariba chèns pa tuma revancha.

Despues di a sali pèrdè su promé wega den e kompetensia di Latin American Junior League 2023 den Tio Daou Ballpark, e tim a gana sobrá di su kompromisonan. Esaki aunke no ta tur ora esaki a hunga su mihó beisbòl.

Final di kuenta Pabou i Pariba a eleminá tur kontrinkante pa asina topa otro den final. Di mes Pariba tabata hambrá pa tuma revancha pa e derota den weganan di selekshon lokal, pero Pabou a demonstrá den e final regional ku e ta simpelmente superior.

Pabou a seyá e triunfo for di tempran. Ya den di promé inen e tim kampion di Kòrsou a hinka 7 kareda. Den su di dos turno kuater hungadó mas a krusa plato: 11-0. Den di kuater inen Pariba a skor su úniko dos karedanan di wega: 11-2. Ku 1 kareda mas den bòm dje di sinku inen Pabou a kaba kos tempran pa via dje regla di nòkout (diferensia di 10 kareda): 12 pa 2.

Davey-Jay Rijke tabata grandi pa Pabou. Ela pichá 4 inen i dostèrsio pèrmitiendo 2 kareda riba 3 hit. Ela poncho 7 batiadó i duna 3 base por bola. Na bate tambe Rijke a sobresalí. E hóben talentoso a dal 2 hit den 2 turno. Porsierto ku aña pasá e tabata e strea di Pabou Little League ku a bira kampion Internashonal i tèrminá komo supkampion den Little League World Series 2022 aya na Williamsport.

Mas aleu Jaydiar Kopra tambe tabatin un bon anochi na plato pa Pabou Junior League. Ela dal 2 hit den 3 turno na bate. Gilventon Josephina, Isaac Acosta i Victor Nieves tur a konektá 1 hit den 1 turno.