Kòrsou ta kampion dje kompetensia Latin American Junior League 2023. Ya por bisa esaki ku orguyo pasobra Liga Pariba i Liga Pabou a klasifiká ayera djabièrnè 21 di yüli pa e gran final. Esaki ta tuma lugá awe djasabra 7or di anochi.
Liga Pabou ayera’nochi den Tio Daou Ballpark a nòkout Venezuela ku skor di 13 pa 3. Ku e triunfo aki e tim kampion di Kòrsou a klasifiká pa e final dje kompetensia di Latin American Junior League.
Venezuela a sali brabu hinkando 2 kareda den promé inen pa bai dilanti 2 pa 0. Ku 1 kareda den di dos inen Pabou a kòrtá e ventaha pa despues den su di tres turno na bate hinka 7 kareda pa bòltu e skor: 8 pa 2.
Despues ku tur dos tim a skor 1 kareda den di kuater inen (9-3), e kampion di Kòrsou a hinka 4 kareda mas i hasi e skor 13 pa 3. Komo ku Venezuela no a skor mas, Liga Pabou a kana e wega pa via di regla di nòkout.
Den e otro wega ku a tuma lugá mitar di tres Liga Pariba a sali kontra di Panama ku te na e momentu ei tabata invikto den e kompetensia. E tim supkampion di Kòrsou a kuminsá agresivo hinkando 4 kareda den promé inen. Panama a kontestá ku 1 kareda den bòm dje inen aki.
Ku 5 kareda den di tres inen Pariba a tuma ventaha mas kómodo: 9 pa 1. Den di sinku inen atrobe e tim di Kòrsou a skor 4 kareda pa yega 13 kareda. Komo ku Panama no a hinka kareda e wega a kaba pa via di regla di nòkout na fabor di Pariba.
Tabata e promé derota pa Panama den e kompetensia di Latin American Junior League 2023. E tin a tèrminá e buelta preleminar ku 3 wega ganá i dor dje derota ayera a faya klasifikashon pa final.
E final ta bai awor entre Pariba i Pabou. Anteriormente Pabou a gana e weganan di selekshon pa representá Kòrsou den e kompetensia di Latin American Junior League. Komo pais anfitrión Kòrsou a hunga ku e timnan aki ku awor ta bai bolbe topa otro den otro gran final.
