Liga Pabou i Liga Pariba ayera djaweps 20 di yüli, a klasifiká pa semi final dje kompetensia di Latin American Junior League 2023. Esaki ta konsistí di un wega i ta kuminsa awe djabièrnè mes. Pariba ta hunga mitar di tres kontra di Panama, miéntras ku anochi 7or Pabou ta topa Venezuela.
Liga Pariba den su wega di ayeranochi 7or a sali hinka 4 kareda den promé inen kontra di Nicaragua pa bai ariba 4 pa 0. Den di dos turno na bate e tim di Kòrsou a skor un kareda mas pa hasi e wega 5 pa 0. Den bòm dje mesun inen Nicaragua a skor 4 biaha i pa kòrta e ventaha di Pariba te na 1 kareda.
Den di tres inen Kòrsou a hinka 1 kareda i den di su di sinku turno na bate atrobe 4 kareda pa amplia e ventaha na 6 kareda: 10 pa 4. Den bòm dje mesun sinku inen Nicaragua a skor 3 kareda pa bolbe kòrta e ventaha di Pariba e biaha akí na 3 kareda.
E sigieunte dos inennan e timnan no a skor mas i Pariba a seyá su di 3 triunfo kontra un derota. Ku e rèkòrt akí e tim di Kòrsou a pasa pa semi final.
Den e wega di mitar di tres ayera Mexico a topa ku Panama. For di promé inen Mexico a sali ataka pone ku mènedjer dje tim kontrali tabatin ku kambia picher. E inen akí a sera despues ku Mexico a skor 6 kareda.
E hungadónan di Panama despues di esei a logra skor 1 kareda den di dos inen i 2 den di kuater pa kòrtá e ventaha di Mexico na mitar. Den di seis inen e tim Panameño a hinka 4 kareda i asina bòltu e skor na su fabor: 7 pa 6.
Den di shete i alabes ultimo inen Mexico a skor 1 kareda pa empatá e wega na 7 kareda. Ku 1 kareda den bòm dje mesun inen akí Panama a laga su kontrinkante den tereno: 8 pa 7.
Ku e viktoria aki e tim Panameño a klasifiká invikto pa semi final invikto ku 3-0. Via dje triunfo di Panama di mes Liga Pabou tambe a logra su klasifikashon ku 2 wega ganá i 1 pèrdí. Mexico a kai afó ku 1 triunfo i 2 derota.
Den e wega di mainta 9or Venezuela tambe a logra su klasifikashon derotando Nicaragua 12 pa 1. Ku 2 kareda den promé inen, 1 den di dos i 7 kareda den di tres inen kontra 1 kareda den di promé inen di Nicaragua, e tim Venezolano a tuma ventaha komodo di 10 pa 1. Ku 1 kareda den tantu di 4 i 5 inen Venezuela a yega 12 kareda pa asina gana via di nòkout di Nicaragua: 12 pa 1.
Curaçao Little League a anunsiá ku entrada pa e weganan den Tio Daou Ballpark ta gratis. Esaki ta danki na gobièrnu di Kòrsou, minister Sithree van Heydoorn ku tin e kartera di Deporte, ku a intervení.