Ku no menos ku 9 kareda den su ultimo inen Liga Pabou a laga Aruba den tereno ku skor di 14 pa 13. E tim rubiano tabata falta tres out ayeranochi den Tio Daou Ballpark pa su promé triunfo den e kompetensia di Latin American Junior League 2023. Ganá 13 pa 5 den di shete inen e tim rubiano finalmente a pèrdè esaki di forma dramátiko.
Liga Pabou ku ta kampion di Kòrsou for dje promé inen a kai atras 2 pa 0. Aruba den su di dos turno a skor 7 kareda i e tim lokal 2 pa asina e tim rubiano tuma un ventaha kómodo di 9 pa 2. Ku 3 kareda mas den di seis inen i 1 den di shete e representashon di Aruba a yega 13 karedda i tabata mustra di ta bai gana su promé wega.
Despues dje 2 karedanan den di dos inen, Pabou a skor tambe 2 den su di tres turno na bate i 1 kareda den di sinku inen pa 5 kareda. Yegando di shete ku ta e ultimo inen e tim kampion di Kòrsou a krusa plato 9 biaha pa bòltu e skor lagando Aruba den tereno.
Apesar ku e tim rubiano tabata e mihó, e derota a bini prinsipalmente dor dje 6 fayonan den defensa. Aruba tabatin 6 eror. Di kual esun fatal tabata presisamente den di shete inen ku a pone Pabou ku sigur tampoko no a hungá bon, gana di chiripa.
Algun ora promé, pa mitar di tres, Liga Pariba a subi tereno kontra di Venezuela ku te na e momentu ei tabata invikto ku 2 wega ganá. E tim bisiña a sali hinka 1 kareda den promé inen ku Kòrsou hinkando mesora 2 kareda den bòm dje mesun inen pa bai ariba 2 pa 1.
Pariba den di tres inen a hinka 4 kareda pa ampliá su ventaha na 6 pa 1. Di su parti Venezuela a skor 1 kareda den di sinku inen, pero e sigiente turno na bate den di seis e tim di Kòrsou a skor 2 kareda mas pa seyá su di dos triunfo den tres wega: 8 pa 2.
Den oranan di mainta presisamente Venezuela a selebrá su di dos viktoria ora e tim a gana di Nicaragua ku skor di 6 pa 4. E tim bisiña a skor 1 kareda den di dos inen i 5 den di kuater. Pèrdí 6 pa 0 Nicaragua a skor 4 kareda den di seis inen. Esaki pues no tabata sufisiente i asina Venezuela a gana e wega akí.
Panama ta e úniko tim invikto ainda den e kompetensia di Latin American Junior League. Ela gana ku relative fasilidat su dos weganan ku ela hunga te ku awor den pul B. Den Pul A Liga Pariba i Venezuela ta kompartí e promé puesto ku 2 triunfo i 1 derota. Den Pul B Liga Pabou tin 2 wega ganá i un derota tras di Panama ku ta 2-0.
E kompetensia ta sigui awe djaweps ku Venezuela kontra di Nicaragua kuminsando djis aki 9or di mainta. Pa mitar di tres tin e wega entre Mexico i Panama, miéentras ku anochi 7or Liga Pariba ta topa ku Nicaragua.