Liga Pabou ayera, djamars 18 di yüli, a gana su promé wega den e kompetensia di Latin American Junior League 2023. E kampion di Kòrsou a derotá Mexico ku skor di 8 pa 2. Di otro banda Liga Pariba a sufri un nòkout fulminante kontra di Venezuela: 17 pa 2.
E kompetensia di Latin American Junior League 2023 a sigui ayera ku atrobe tres wega den Tio Daou Ballpark. E se;ekshonnan ta partí den dos pul.
Despues di a pèrdè su promé wega kontra di Panama (11-5) djaluna, ayeranochi 7or Liga Pabou a bin desidido pa gana. Den bòm di promé inen e tim a skor 3 kareda i tuma ventaha di 3 pa 1. E kampion di Kòrsou a defende esaki te na final.
Ku 1 kareda den di tres inen, 3 mas den di kuater i atrobe 1 kareda den di sinku inen, Pabou a komodo dilanti: 8 pa 1. Den di shete i alabes ultimo inen Mexico a hinka un kareda mas pero no por a evitá su promé derota den e kompetensia despues di a gana Aruba 6 pa 4 den e wega inisial.
Den e di dos wega di dia ku a kuminsá mitar di tres Venezuela a sali hinka 4 kareda den promé inen. Liga Pariba den bòm di mesun inen a skor 2 kareda ku a resultá finalmente di tabata e úniko karedanan pa e tim lokal.
Venezuela sinembargo a sigui skor. E tim dje pais bisiña a hinka 6 kareda den di dos inen i despues 7 den su di tres turno na bate pa asina totalisá 17 kareda. Na final dje di kuater inen a para e wega via dje regla di nòkout na fabor di Venezuela.
E promé wega di dia ku tabata 9or di mainta tambe tabatin hopi kareda, pero a bai te ku seis inen. Tabata den di seis inen ku Panama a hinka 7 kareda kontra di Aruba pa hasi e skor 18 pa 4. E tim promé ku esaki a skor 5 kareda den di promé inen, atrobe 5 den di tres i 1 kareda den su di sinku turno na bate. Ariuba di su banda a skor 1 kareda den di dos inen i 3 den di 5 pa total 4 kareda.
Despues di dos dia di kompetensia Venezuela ta na promé lugá di pul A ku 1 triunfo. Liga Pariba ta sigui ku 1 wega ganá i 1 pèrdí, siguí na ultimo puesto pa Nicaragua ku 1 derota.
Den pul B Panama ta ariba ku 2 triunfo. Esakinan ta kontra di Liga Pabou (11-5) i Aruba (18-4). Liga Pabou i Mexico ta sigui ku mesun rèkòrt di 1 wega ganá i 1 pèrdí. Aruba ta ultimo ku 2 derota.
E kompetensia di Latin American Junior League ta sigui awe den Tio Daou Ballpark. Djis aki 9or tin e wega entre Nicaragua i Venezuela. Mitar di tres Venezuela ta bolbe subi tereno kontra di Liga Pariba i 7or di anochi Liga Pabou ta hunga kontra di Aruba.
