E promé dia dje kompetensia di Latin American Junior Championship 2023 a kuminsá ayera, djaluna 17 di yüli, bon pa Liga Pariba i malu pa Pabou. E tim di Pariba a gana ku skor konvinsente di 11 pa 1 via di nòkout di Nicaragua, miéntras ku Panama a derotá Pabou 11 pa 5.
E weganan dje kompetensia di Latin American Junior 2023 ta tuma lugá den Tio Daou Ballpark na Kòrsou. E timnan ta hunga den dos pul. Anto komo pais anfitrión Kòrsou ta hunga ku dos selekshon. Liga Pabou ta ofisial e selekshon kampion lokal.
Un bon públiko a presentá ayeranochi den Tio Daou Ballpark pa wak e wega entre Liga Pabou i Panama. Esaki a mustrá di tabat bai bira un bon wega i alabes duelo di picheo, ora ku e timnan den e promé inennan no a skor. Tabata Panama ku den su di tres turno na bate a subi bòrchi ku 4 kareda pa tuma ventaha komodo di 4-0.
E kampion di Kòrsou no a pèrdè pa gana i mesora den di kuater inen a menasá, pero a skor solamente 1 kareda. Panama sinembargo den di sinku inen a hinká 3 kareda mas pa ampliá e skor bai 7 pa 1.
Liga Pabou no tabata ke entregá i ku 2 kareda den di seis inen a bolbe kòrtá e ventaha dje kontrinkante: 3-7. Pero Panama a sòru pa e gòlpi di grasia den bòm di mesun inen ora ela skor 4 kareda mas purbando na seyá e viktoria: 11 pa 3. Den su di shete i último turno na bate e tim kampion di Kòrsou a bolbe menasá pero ku solamente 2 kareda mas a keda finalmente kòrtiku: 11 pa 5 pa Panama.
Den e wega di mitar di 3 Liga Pariba no a laga niun duda i a nòkout e selekshon di Nicaragua ku skor di 11 pa 1. E tim lokal a sali hinka 2 kareda den promé inen, 1 den su di dos turno i 5 kareda den di tres inen pa bai dilanti kómodo ku skor di 8 pa 0.
Nicaragua den di sinku inen a skor su promé i ku a resultá despues su úniko kareda dje wega. Pa Liga Pariba sinembargo no tabata sufisiente i e supkampion di Kòrsou a skor 3 kareda mas den bòn dje mesun sinku inen pa totalisá 11 kareda i asina via di regla di nòkout kaba e wega tempran.
E promé wega dje kompetensia a bai entre Aruba i Mexico. E tim di Aruba a kuminsá bon tumando ventaha for di tempran dje wega. Ku 1 kareda den di dos i tres inen ela tuma ventaha di 2-0. Mexico ku 5 kareda den su di kuater turno pa bòltu e skor na su fabor: 5-2.
Den di sinku inen Mexico a hinka 1 kareda mas pa hasi e wega 6 pa 2. E tim rubiano di su banda a skor 2 kareda den di seis inen pa aserká te na 6 pa 4. Niun dje timnan a skor den di shete inen i asina Mexico a gana e wega ku e skor akí: 6 pa 4.
E kompetensia ta sigui awe djamars ku atrobe tres wega den Tio Daou Ballpark. Aruba i Panama ta hunga tempran mainta kontra di otro. Pa mitar di 3 tin e wega entre kòrsou Pariba i Venezuela, miéntras ku anochi 7or Kòrsou Pabou ta hunga kontra di Mexico.
