Liga Pabou a titulá kampion invikto dje kompetensia Little League Caribbean Championship 2023. E tim di Repúblika Dominikana tambe a haña: 6 pa 0. Asina Liga Pabou e aña’ki tambe pues ta bai representá region di Karibe den Little League World Series na Williamsport, Merka.
Meskos ku den e weganan preleminar i prefinal, Liga Pabou awe tambe mesora a sali pika dilanti den promé inen: 1 pa 0. Despues di dos inen sin skor, e tim den su di kuater turno na bate a skor 2 kareda mas: 3-0. I finalmente den di sinku inen tabatin 3 kareda mas pa fihá e skor final na 6 pa 0.
Jay-Dlynn atrobe tabata grandi pa Liga Pabou. Ela sobresalí tantu den bateo komo riba montíkulo. Ku 1 hit den 2 turno na bate ela pusha 2 dje 6 karedanan aden. Su hit tabata un doblete. Komo picher Jay-Dlynn a pèrmití solamente 3 hit. Ela ponchá 10 batiadó di Repúblika Dominikana.
Awor Liga Pabou ta bolbe kas pa djis despues sali pa Williamsport kaminda tradishonalmente Little League World Series ta tuma lugá. Porsierto ku e tim lokal ta bai defende e titulo di kampion internashonal den e kompetensia akí i alabes purba di bini kas ku e titulo mundial tambe.
Little League World Series 2023 ta kuminsá otro luna, 16 di ougùstùs. E ta dura te ku 27 di ougùstùs. Liga Pabou Kòrsou den representashon di region di Karibe ta hunga su promé wega riba 17 di ougùstus. E kontrinkante ta Oustralia.