Liga Pabou den representashon di Kòrsou i Karibe a gana su promé wega den Senior League World Series na Easley, South Carolina (Merka). E tim a derotá Hulanda ku skor di 16 pa 13. E picheo di Kòrsou sinembargo tabata erátiko ku vários base por bola i tambe deadballs.
Kòrsou a skor for di trempan i kasi henter e wega tabata dilanti i tur kos tabata indiká ku e triunfo tabata sigurá. Sinembargo Hulanda den fase final a empatá e skor i asta bòltu esaki na 13 pa 11.
E batiadónan di Kòrsou ku sinembargo henter e wega sí a hasi nan trabou, a sigui bati i empatá e wega na 13 kareda den di shete inen. Den extra inen e tim a skor 3 kareda mas pa atrobe bai dilanti e biaha’kí 16 pa 13. Komo ku Hulanda no a skor den bòm dje di ocho inen, Kòrsou a gana e wega.
Kòrsou a skor 16 kareda riba 20 hit. E tim tabatin dos fayo den su defensa. Hulanda a tèrminá ku 13 kareda riba 9 hit i ku 4 eror.
