Un total di 29 tim ta kompetí den e torneo di futbòl pa Kopa Kòrsou: 25 maskulino i 4 femenino. Bala ta kuminsá lora mañan djabièrnè ku kuater wega: dos den Stadion Dr Antoine Maduro na Kinchán i tambe dos enkuentro den Stadion Rignaal Jean Francisca na Brievengat.
Federashon Futbòl Kòrsou (FFK) i Fundashon Desaroyo Deportivo Kòrsou (FDDK) a organisá djamars último e sorteo pa e torneo pa Kopa Kòrsou. Esaki a tuma lugá den sentro di media Kontentu den Sambil.
E 25 timnan maskulino ku ta kompetí for di mañan 9 di mei te ku dia 2 di yüli ku ta riba Dia di Bandera, den e promé edishon dje toreno pa Kopa Kòrsou ta hunga den seis pul. Den grupo A, B, C, D i E tin kuater ekipo i den grupo F tin sinku tim.
E timnan den grupo A ta Sport Unie Brion Trappers (SUBT), Hubentut Fortuna, FC Inter i Haitian Union Club. Inter Willemstad, Victory Boys, S.V. Vriendschap Eendracht Sterken Tegen Alles (Vesta) i C-Stars United ta den grupo B. E teamnan di grupo C ta RKSV Scherpenheuvel, FC Sithoc, Union Deportivo Tera Kòrá i Wishi Marchena. Den grupo D ta hunga Jong Holland, Union Deportivo Bándabou (Undeba), SV Indekor i Centro Hubenil Mahuma. E timnan den grupo E ta Jong Colombia, SV New Song, SV Atomic i SV De Koning, mientras ku den grupo F tin Centro Dominguito, Atlétiko Saliña, Centro Deportivo Sta Rosa, FC West Wolf United i Stallions FC.
E kuater timnan femenino ku ta kompetí pa Kopa Kòrsou ta: Undeba, Inter Willemstad, Hubentut Fortuna i Excellence. Esakinan ta hunga dos buelta segun e sistema di ‘round robin’, esta ku tur tim ta hunga dos biaha kontra di otro.
Mañan djabièrnè tin e promé weganan. Pa 7or tin planiá den Stadion Dr Antoine Maduro e enkuentro entre SUBT i Haitian Union Club. E di dos partido den mesun stadion ta kuminsá 9or i ta Hubentut Fortuna kontra di FC Inter.
Den Stadion Rignaal Jean Francisca ta hunga mesun 7or Jong Holland kontra di Centro Hubenil Mahuma i pa 9or tin e enkuentro entre Undeba i Indekor.
E torneo pa Kopa Kòrsou ta sigui djasabra den atrobe ku dos wega den Stadion Dr Antoine Maduro i dos otro wega den Stadion Rignaal Jean Francisca. Esakinan ta tambe ta kuminsá 7or i 9or.
Riba djadumingo tin dos wega den Stadion Ergilio Hato di Sentro Deportivo Kòrsou (SDK) na Brievengat. E enkuentronan akí ta mitar di 6 i mitar di 8. Riba mesun djadumingu i oranan tin tambe wega den Stadion Rignaal Jean Francisca.
