Jong Colombia a registrá su di dos viktoria den e torneo pa Kopa Kòrsou. E tim a gana djarason 14 di mei ku skor di 4 pa 1 di SV New Song. E Samineronan awor ta sólido na kabes den pul E ku 6 punto for di 2 wega.
Den su promé kompromiso Jong Colombia tabatin un fiesta di gol kontra SV De Koning: 12 pa 0. Den dos wega e tim Saminero pues tin 16 gol na fabor i 1 kontra.
Den pul C Skèrpènè ku den su promé wega dje torneo a gana ku skor di 9 pa 0 di Wishi Marchena, ayera a empatá na 0 gol ku FC Sithoc. E tim Kolegial den su promé enkuentra a gana ku skor di 3 pa 2 di Union Deportivo Tera Kòrá.
Despues di a empatá na 2 gol ku SUBT den su promé wega dje torneo den pul A, ayera djarason Haitian Union Club a gana ku skor di 3 pa 1 di FC Inter. E tim di SUBT tambe a logra un viktoria ku skor di 5 pa 1 riba Hubentut Fortuna.
Mas aleu den pul E e tim di Atomic a registrá un triunfo di 7 pa 0 riba De Koning. Den pul C Union Deportivo Tera Kòrá a gana ku skor di 5 pa 1 di Wishi Marchena. Tantu De Koning komo Wishi Marchena ta ainda sin viktoria den e torneo.
E kompetensia ta sigui awenochi ku 6 wega den stadionnan Ergilio Hato, Rignaal Jean Francisca i Dr Antoine Maduro.
Den Stadion Rignaal Jean Francisca na Brievengat tin pa 7or e wega entre C-Stars United iSV VESTA i pa 9or Centro Hubenil Mahuma ta hunga kontra SV Indekor. Den Stadion Dr Antoine Maduro na Kintjan/Vredeberg, miéntras ku FC West Wolf United ta topa Stallions FC 7or i 9or tin e wega entre Inter Willemstad i Victory Boys.
Den Stadion Ergilio Hato na Brievengat tin 7or e enkuentro entre Centro Deportivo Sta Rosa i Centro Dominguito, miéntras ku 9or Jong Holland ta hunga kontra Undeba.
FOTONAN JACINTO DE JESUS
