E fiesta di gol a sigui ayera djaluna 19 di mei den e torneo pa Kopa Kòrsou. Jong Holland a gana ku skor amplio di 8 pa 1 di Indekor. E resultado aki ta nifiká ku e tim trikolor ta sigui na kabes den pul D ku 9 punto for di 3 wega.
FC Sithoc tambe tabata produktivo ayera den kontinuashon dje kompetensia pa Kopa Kòrsou. E tim kolegial a gana ku skor di 5 pa 0 di Wishi Marchena i a pasa pa komandá e tabla di posishon ku 7 punto den pul C.
Den pul B parse ku Victory Boys su mashin di gol tambe a start. E tim di pariba a gana ku skor di 4 pa 0 di C-Stars United.
Inter Willemstad tampoko a keda’tras i a logra un viktora di 3 pa 0 riba Vesta den mesun pul B. Esaki tabata porsierto e promé derota den e torneo pa e tim di Buena Vista i besindario.
Dor dje triunfonan di Victory Boys i Inter Willemstad a surgi un tripel empate na promé puesto den pul B. Awor Victory Boys, Inter Willemstad i Vesta tin 6 punto. Kada tim a gana dos biaha i pèrde un enkuentro.
E torneo pa Kopa Kòrsou ta sigui awe’nochi djamars ku kuater wega. Skèrpènè ta topa e tim di Tera Kòrá 7or den stadion Dr Antoine Maduro na Kinchan. Den mesun stadion aki Centro Dominguito i Atlétiko Saliña ta hunga kontra di otro.
Den stadion Ergilio Hato di Sentro Deportivo Kòrsou (SDK) na Brievengat tin 7or e wega entre Stallions FC i Centro Deportivo Sta Rosa. SV New Song i SV De Koning ta topa otro for di 9or den mesun stadion akí.