Después di a sufri su promé derota djabièrnè 2 di mei último, Kenley Jansen un dia despues a registrá su di 7 wega salbá. E ‘closer’ yu di Kòrsou pues a rekuperá lihé i ta sigui riba e bon kaminda pa logra 30 òf mas wega salbá den e temporada nobo akí di Major League Baseball (MLB).
Ku e skor empatá na 1 kareda, e mènedjer di Los Angeles Angels den di nuebe inen a konfiá Kenley Jansen ku e bala. Sinembargo e batiadónan di Detroit Tigers a dal’é duru i skor no menos ku 6 kareda kontra dje.
Esei tabata e promé biaha ku Jansen e temporada’ki a pèrmití kareda. Un nota remarkabel ta ku dje 6 hitnan kontra dje, 3 tabata homeruns. Ora ku Kenley Jansen no por a sali afó, e mènedjer di Los Angeles Angels a remplas’é ku Jake Eder. E picher akí tambe a pèrmití 1 homerun i 2 kareda i asina Detroit Tigers a gana ku skor di 9 pa 1.
Un otro nota remarkabel ta ku dje 20 balanan ku Kenley Jansen a tira pa su kècher, 18 tabata strike. E dos batiadónan ku ela logra saka out tabata via di un ponche i un roletaso. E otro seis batiadónan pues a dal’é duru i propiná e yu di Kòrsou su promé derota pa e aña’ki.
Apesar dje derota ei, e mènedjer un dia despues a bolbe konfiá Kenley Jansen pa subi riba montíkulo den di nuebe inen. Esaki tabata ku Los Angeles Angels ganando 5 pa 2 di Detroit Tigers. E yu di Kòrsou a tira solamente 3 bala pa retirá dos batiadó i asina a logra su di 7 wega salbá.
Pa motibu dje 6 karedanan ku Kenley Jansen a pèrmití djabièrnè 2 di mei, su promedio di kareda pèrmití a bula di 0.00 bai riba 6.00 i via dje wega salbá e siguente dia ku tabata djasabra, ela baha esaki na 5.79. Te ku awor e yu di Kòrsou a ponchá 9 batiadó den 9 inen i1 tèrsio.
Porsierto ku su tim Los Angeles Angels a pèrdé e seri di weganan kontra di Detroit Tigers 1-3 i ta último den divishon West di American League. E tim di Kenley Jansen tin solamente 13 viktoria i a sufri 20 derota te ku awor. Detroit Tigers ta na kabes dje divishon Sèntral di American League ku 22 triunfo i 13 derota.
Después di un dia liber ayera djaluna 5 di mei 2025, Los Angeles Angels ta kuminsá awe djamars 6 di mei un seri di wega kontra di Toronto Blue Jays. Detroit Tigers tambe tabatin un dia liber ayera i awe ta kuminsá un seri kontra Colorado Rockies.
