Despues di un lucha tenas e selekshon di Liga Pabou a gana tambe e Seri di Distrito den Senior League, pa’sina logra kueter titulo kampionil den sinku seri. Solamente den Junior League e selekshon di Liga Pariba a logra bira kampion.
Despues di a gana anteriormente e Serinan di Distrito den Minor, Intermediate i Little League, Liga Pabou a pèrdè den Junior League. Liga Pariba a gana esaki konvinsente ku skor di 3-0.
E selekshon di Liga Pariba a gana e promé wega den Junior League ku skor abultá di 12 pa 1. Den e di dos enkuentro e tim a gana atrobe ku skor grandi di 15 pa 3. E di tres konfrontashon a tèrminá ku skor di 11 pa 5.
Ku e tres viktorianan ei Liga Pariba a gana e derechi pa representá Kòrsou den e kampionato di Junior League Latino Amerikano. E kompetensia regional aki ta pa hungadónan den e grupo di edat di 12-14 aña, i ku ta tuma lugá entre 4 i 12 di yüli na Guatemala.
Kontrario na e Seri di Distrito den Junior League ku a kaba den e minimo di tres wega, den Senior League e timnan a hunga 5 wega. E selekshon di Liga Pabou a gana e promé ku skor di 12 pa 6. E di dos konfrontashon a tèrminá ku skor di 7 pa 5 pa Pabou, ku pues tabatin mester solamente un viktoria mas pa bira kampion.
E selekshon di Liga Pariba sinembargo a gana e di tres enkuentro ku 3 pa 1 pa asina prevení su eliminashon promé ku tempu. Despues di e resultado ei e selekshon akí a logra empata e Seri di Distrito na 2-2 ku un viktoria pèrtá di 5 pa 4 den e di kuater wega pa asina forsa un wega desisivo.
Den e desisivo wega ei Liga Pabou a skòr promé: un kareda den e di dos inen pa tuma ventaha minimo di 1 pa 0. Liga Pariba a bòltu e skor ku dos kareda den tantu di tres i kuater inen pa bai dilanti 4 pa 1. Pabou a logra skòr dos kareda den su di kuater turno na bate pa kòrtá e desventaha: 3-4.
Den e di sinku inen Liga Pariba a skor un kareda mas: 5-3. Den e mesun turno na bate Pabou a skòr tres kareda pa bòltu e skor na su fabor: 6-5. Ku dos kareda mas Pabou a bai dilanti ku skor di 8 pa 5. Den e di shete i último inning Pariba a purba di bini bèk pero tabata falta 1 kareda mas pa empatá e wega i a pèrdè pues ku skor di 9 pa 7 di Liga Pabou.
Aunke ku Liga Pabou a gana e derechi pa representá Kòrsou den e kampionato di Karibe di Senior League, Liga Pariba tambe ta partisipá den e kompetensia aki. Esaki ta tuma lugá na Kòrsou entre 22 i 29 di yüni. Regla ta ku e pais anfitrión tin mag di kompetí ku dos tim.
