E kampionato di beisbòl veterano ta sigui djadumingu awor ku weganan na Tio Daou Ballpark. Esaki ta despues ku Jandoret Raiders a gana di Bulldogs 7 pa 4, miéntras ku e otro dos weganan pa motibu di awaseru no a sigui.
Federashon Beisbòl Veterano Kòrsou (Beveko) ta organisá e kampionato Liga 40. E kompetensia regular ta den su fase final pa despues e weganan prefinal kuminsá.
Pa motibu di mal tempu i tambe estado malu di tereno, e federashon a kanselá dos dje tres weganan ku tabata planiá riba djadumingu tras di lomba. Esakinan tabata Quality Stars vs Sta Maria Pirates i Sta Rosa Memories vs Isla Crackers BBC.
E enkuentro entre Jandoret Raiders i Bulldogs sí a sigui. Tabata un konfrontashon ku tabatin un final dramátiko. Bulldogs a skor 4 kareda den di tres inen i tabata parse di bai gana. Jandoret sinembargo no a entregá i a sigui pusha pa finalmente skor 7 kareda den di seis inen pa asina gana ku skor di 7-4.
Jandoret Raiders tabatin 7 kareda riba 8 hit i 2 eror, miéntras ku Bulldogs a kaba ku 4 kareda riba tambe 4 hit. E tim no a komete fayo den defensa.
No ta kla ainda ki dia ta hunga e weganan Quality Stars vs Sta Maria Pirates i Sta Rosa Memories vs Isla Crackers BBC. E skèdjul ta indiká ku djadumingu awor tin e sigiuente tres weganan: Sta Maria Pirates vs Jandoret Raiders pa mitar di 11, Bulldogs vs Sta Rosa Memories un’or di tra’i mèrdia i Isla Crackers BBC vs Quality Stars pa mitar di 4 atardi.
