Marchena Braves ayera, djasabra 4 di mei 2019, a pasa den sustu ora ku Groot Kwartier Stars Mangusa a bini djatras i empatá wega 7-7 den di seis inen. Den e sigiuente turno, esta di 7 inen, Braves a skor e kareda di gana: 8-7.
Federashon Beisbòl Kòrsou (Febeko) a sigui ayera ku e kampionato nobo di beisbòl dòbel A. E kompetensia ku ta patrosiná atrobe pa Aqualectra, a kontinuá den Stadion Johnny Vrutaal na Rif, Otrobanda.
Marchena Braves a sali brabu ku 4 kareda den promé inen. Despues di dos turno sin kareda, Groot Kwartier Stars a hinka 2 den di tres inen pa aserká te na 2-4.
Den di sinku inen Braves a skor 1 kareda i Kwartier 2 pa e skor bira 5-4 ketu bai na fabor dje tim di Marchena. Despues ku Marchena Braves a hinka 2 kareda mas den di seis inen, Kwartier a kontestá ku 3 den bòm di mesun entrada pa asina empatá e wega na 7 kareda.
E alegria serka Groot Kwartier Stars tabata sinembargo kòrtiku, pasobra Marchena Braves den di shete inen a bolbe tumba ventaha: 8-7. E wega a kaba ku e skor aki.
Picher Wernet a gana e wega pa Marchena Braves. Ela drenta den di sinku inen na lugá picher relevo Sille ku na su turno a remplasá Attaf ku anteriormente a relevá picher habridó Willems. Wernet den 1,2 inen di trabou no a pèrmití hit ni kareda na Groot Kwartier Stars.
Martijn a sobresalí na bate pa Marchena Braves. Ela dal 2 hit den 3 turno. Su kompañero Henrietta tambe a bati 2 hit pero den 4 turno.
Pa Groot Kwartier Stars picher pèrdèdó a resultá De Windt ku a drenta wega den di seis inen. Ela pèrmití 1 kareda i 1 hit den 1,1 inen di trabou. Picher habridó tabata Martina ku den 5,2 inen a pèrmití 7 kareda riba 8 hit.
Daal i Adamus tabata e mihó bateadónan pa Marchena Braves. Daal a kaba ku 3 hit den 4 turno i a sòru pa hinka 3 kareda ku su hitnan. Adamas a dal 2 hit den 3 turno na bate.
