Sport.cw

Sponsored by

Sponsored by

Sponsored by

Bunita akshon di basketbòl

E kampionato di basketbòl di Kòrsou a sigui den wikènt ku dos wega den kategoria Senior. Vikings a gana di Montaña Spartans ku skor di 66-52, miéntras ku Willemstad Warriors a triunfá ku skor di 90-55 riba Curaçao Trotters.

Curaçao Basketball Federation (Cubafe) ta bolbe organisá e kampionato nobo den diferente kategoria. E kompetensia a kontinuá den wikènt den sala Niels Liberia di Stadion Odulio Willems na Suffisant.

Vikings a logra su di dos triunfo den promé buelta, ora ku ela superá Montaña Spartans; 66-52. Clayton Zimmerman a destaká pa e tim ganadó ku 19 punto. Pa Spartans Jean-Luis Encarnacion i Jose Tejeda a skor 11 punto.

Willemstad Warriors tambe a registrá su di dos viktoria den e kampionato, ora ku ela derotá Curaçao Trotters ku skor di 90-55. Rogeny Cijntje di Warriors a sali ’topscorer’ dje wega ku 19 punto, miéntras ku pa Trotters Knijl Inees tabata bon pa 18 punto.

Den kategoria Senior Janwé Spartacus ta invikto ainda den 3 wega i ta komandá e tabla di posishon. Vikings i Warriors ta okupá e di dos puesto, kada un ku 2 viktoria i 1 derota. Montaña Spartans i Curaçao Trotters ta kompartí e di 4 lugá ku 1 triunfo i 2 derota. Fortuna Brothers ta último sin viktoria den 3 kompromiso.

Translate »