E serinan prefinal den divishon superior di Federashon Vòlibòl Kòrsou (Fevoko) ta mustra di bai bira hopi interesante. E semi final a ranka sali ku algun bon wega kaminda ku den kategoria femenino Shuatanari i Stakamahakchi a pika dilanti, miéntras ku den maskulino esakinan tabata Watakeli i Xaverianen.
Despues dje bueltanan preliminar awor e seri di weganan prefinal, esta ‘play-off’, tambe ta hunga den sala Errol Rooi di Sentro Deportivo Kòrsou (SDK) na Brievengat. E kompetensia di Fevoko ta dediká na e baluarte Dito Ravenstein.
Den divishon superior femenino Shuatanari a tuma ventaha 1-0 den e seri prefinal. Esaki no a bai fasilm, pasobra Hurricane a batayá fuerte pero finalmente a kai vensí 3-2. E parsialnan na fabor di Shuatanari tabata 25-22, 19-25, 25-18, 23-25 i 15-12.
Den e otro seri den kategoria femenino Stakamahakchi Guardian Group no tabatin masha dolor di kabes, aunke ku Watakeli den di tres sèt e lucha duru pero a kai chikí: 3-0, 25-11, 25-18 i 25-23.
Den kategoria maskulino si e organisashon di Watakeli a sali viktorioso. E tim di spònser pa Building Depot a triunfá ku skor di 3-0 riba Titus. E parsialnan tabata 25-12, 25-20 i 25-12.
Den e otro seri den mesun sekshon maskulino Xaverianen a superá Stakamahakchi ku skor di 3-1. E parsialnan tabata 25-11, 20-25, 25-21 i 25-21,
E seri prefinal den divishon superior ta kontinuá mañan, djarason 17 di aprel, ku weganan den kategoria maskulino.
