Despues di a pèrdè i promé dos weganan, Dream Team a gana e sigiuente tres weganan pa asina titulá kampion di sòfbòl maskulino fast pitch. E di sinku wega dje seri final tabatin un final dramátiko. Argenis Daal a bati un homerun ku un kompañero na base pa asina laga Suffisant Eagles den tereno: 9-8.
Suffisant Eagles despues di a gana e promé dos weganan di final, tabatin mester di un viktoria mas pa titulá kampion. Dream Team ku tabata lomba kontra muraya i dos man na laira, sinembargo no a entregá. Dream Team pues a bini dja’tras ganando e sigiuente dos weganan pa empatá e seri i forsá un di 5 wega.
E enkuentro desisivo ayera tabata un tremendo konfrontashon. E timnan a yega shete inen ku e skor empatá na 3 kareda. Esei a nifiká ku tabatin ku hunga dos èkstra inen.
E wega a kuminsá ku tur dos tim anotando 1 kareda den promé inen. Dream Team den su di tres turno na bate a pika dilanti 2-1. Suffisant Eagles den di kuater i di sinku inen a skor 1 kareda pa tuma ventaha di 3-2. Dream Team den su ultimo turno na bate a logra empatá e wega 3-3 i asina forsa èkstra inen.
Tantu Suffisant Eagles komo Dream Team a skor 4 kareda den di ocho inen: 7-7. Den di nuebe entrada e tim di Suffisant a skor 1 kareda pa bolbe bai dilanti: 8-7. Tur kos tabata indiká ku e tim ta bai gana e wega, te ora ku Argenis Daal a a bin bati pa Dream Team. Ku un kompañero den sirkulashon, ela bati e bala saka fo’i tereno pa laga e kontrinkantenan den tereno: 9-8.
Porsierto ku tabatin 4 homerun den e wega ayera. Fuera di Argenis Daal, Guiomar Isena tambe a saka e bala fo’i tereno pa Dream Team. Pa Suffisant Eagles Juruengelo Thielman i Yurendell de Caster a bati homerun.
Picher ganadó a resultá Fransel Meyers. Ela sali porsierto tambe Player of the Game i Most Valuable Player dje final. Julius Veeris tabata e picher pèrdedó di ayera.
