E kompetensia di futbòl den promé divishon, esta Liga MCB, ta sigui djabièrnè aki, 25 di yüni. Union Deportivo Bandabou (Undeba) i aktual kampion Skèrpènè ta hunga kontra di otro den Stadion Dr. Antoine Maduro na Kinchán. Jong Holland te ainda ta okupá e promé puesto ku 6 punto for di 2 wega.
Despues di e asina yamá ‘lockdown’ pa motibu di Covid-19, e kompetensia den Liga MCB a sigui siman pasá ku algun wega. Esakinan a tuma lugá den tantu Stadion Ergilio Hato komo den Stadion Dr. Antoine Maduro.
E kompetensia a ranka sali originalmente den luna di mart. Despues di 5 wega Federashon Futbòl Kòrsou (FFK) a para e kampionato pa motibu dje regla di ‘lockdown’.
FFK a reanudá e kompetensia den promé divishon, Liga MCB, riba 18 di yüni. Skèrpènè a gana ku skor di 2-0 di Victory Boys, miéntras ku Sithoc a derotá Undeba ku 3-1. Un dia despues, 19 di yüni, Centro Dominguito a pasa riba Vesta ku skor tambe di 3-1, miéntras ku Jong Holland a triunfá ku 2-0 riba Inter Willemstad. Ayera djaluna, 21 di yüni, Centro Barber a superá SUBT ku skor di 2-1.
Despues di 10 wega Jong Holland ta okupá e promé lugá ku 6 punto. E tim trikolor a gana su promé kompromiso riba 13 di mart ku skor di 2-0 di Vesta.
Sithoc, Skèrpènè i Centro Barber a kompartí e di dos puesto, kada un ku 4 punto: 1 triunfo i 1 empate. Sithoc a gana su promé wega riba 14 di mart ku SUBT: 1-1. Skèrpènè riba 12 di mart tambe a hunga 1-1 ku Inter Willemstad. Centro Barber riba 7 di mart a tablá 2-2 ku Victory Boys.