Federashon di Tenis di Mesa Korsou (FTMK) ta mira atras riba un siman eksitoso di kompetensia. Un total di tres torneo a keda organisá kaminda ku komo kampion a sali Netty Keli, Dimitri Leon i Raymond Begina.
E siman di kompetensia a ranka sali ku e tradishonal torneo pa Kopa Irene Moreno. E sigiuente hungadónan femenino a kompetí kontra di otro: Netty Keli, Ronella Vos, Zachra Rademaker i Geraldine Hernandez.
E final a bai entre e dos hobennan Keli i Vos. Nan ta ful den treinen i tabatin bon prestashon durante e torneo. Nan a hunga un tremendo wega final, kaminda ku Keli a terminá komo kampion. Ela risibi e Kopa Irene Moreno for di famia Moreno, ku tambe a entrega un plakat na direktiva di FTMK relashoná ku 35 aniversario dje kompetensia dediká na e legendario Ireno Moreno.
Fuera dje torneo pa Kopa Irene Moreno pa hungadónan femenino, tabatin tambe esun pa Kopa Harry Walters. Manera tur aña ta e kaso, famia Walters a patrosiná e promé torneo di aña den e divishon di mas haltu na Kòrsou ku ta Klase A.
Un rekòrt kantidat di 23 hungadó a inskribí pa kompetí den e torneo. E kompetensia tabata kayente ku hopi wega terminando ku skornan pèrta pèrta. Dimitri Leon, Ravi Rajwani, Raymond Begina i Henny Metry a klasifiká den e promé kwaternan pa bai semi final.
Den semi final Leon no a hasi niun fayo i a gana e ‘best of three’ fasilmente di Begina ku e skor di 2-0. Den e otro pul Rajwani tabata superior na Metry, tambe ku e skor di 2-0. Leon ku Rajwani a topa otro den un tremendo final ku Leon ganando den un seri di ‘best of five’ duru bringá: 3-1
Den e promé torneo di Masters di Kòrsou kaminda tin partispashon di hungadónan 60+, tambe tabatin bon wega. Raymond Begina a gana e torneo aki ku a konta ku partisipashon tambe di hungadónan manera Eric Adamus, Raymond Cathalina, Peter Wong, Lucien Alberg, Jasinto Zimmerman, Hensley Wentwoord.
Sorpresa grandi tabata sinembargo Ralston ‘Lalo’ Arvelo ku a sali derotá Begina ku skor di 2-1 den e promé buelta, spantando tur hende den sala . Begina despues di un lucha tenas a logra klasifiká den e promé kuaternan tòg. E otro tres semi-finalistanan tabata Wentwoord, Zimmerman i Adamus.
Den semi-final Begina a derotá Wentwoord ku skor di 2-1, miéntras ku Zimmerman a gana di Adamus tambe ku skor di 2-1. Den e final entre Zimmerman i Begina, e ultimo a gana ku skor di 3-0. Asina aki ela sigui ku su racha ganando atrobe e torneo di Masters.
