Un total di 64 gol a keda di skor den kontinuashon dje kampionato di futsal lokal. E wega ku mas gol den divishon A tabata den e wega Ocean View FC vs FC Babranis 01: 4-7. Den divishon B tabata e enkuentro ku FC Sta Rosa Stars a gana ku skor di 7-6 di FC Sta Helena.
E kompetensia ku Futsal Federation Curaçao ta organisá aktualmente, ta hopi kayente den tantu divishon A i B. E weganan ta keda hungá den sala Niels Liberia di stadion Odulio Willems den Suffisant.
Ku e viktoria di FC Babranis 01 riba Ocean View FC di 7-4, e tim ganadó a pa okupá e promé puesto den divishon A ku 9 punto. E ta kompartí e puesto aki ku FC-IGA, ku a triunfá ku skor di 3-2 riba FC FCF.
Na sosiegu e wega entre FC Babranis 01 i Ocean View tabata 3-3. Den di dos tempu Babranis a bai laga su kontrinkante. E golnan dje tim ganadó a keda di skor pa Maikel Pinedo (2), Jeandrick Hugo (2), Schurwendley Vicento (2) i Maudimar Quandus. Den kousa pèrdí a skor pa Ocean View: Jamian De Kaster (2), Rayson Koeiman i Stallone Isenia.
Den e enkuentro ku FC-IGA a sorprendé FC FCF (3-2), e goleadónan pa e ekipo ganadó tabata: Jeandro Wilson, Lindomar Tromp i Djurson Pieters. Pa FC FCF tabata éksitoso Roderick Jobs i Ruchino Kirindoongo. Na mitar di wega e skor tabata 1-1.
Mas aleu Pantera Negras i FC Don Bosco a empatá na 2 gol ku otro. E golnan di Pantera Negras a keda anotá pa Rignon Weyman, miéntras e goleadó pa FC Don Bosco tabata Oscar Seco Vegas.
Finalmente FFCE United FC tambe a gana su wega den divishon A. Esaki a sosode ku skor di 4-3 riba FC RO Family. E golnan di FFCE United FC a keda di skor pa: Dannick Koeiman (3) i Guisseppe Best. Pa FC RO Family a hinka gol: Raylon Eugenio (2) i Sidney Leonora.
Den divishon B e ekipo di FC Securitas Antias ta sigui firme na kabes despues di a lográ su di 6 viktoria. Ela derotá Dòmi ku skor di 4-1 i awor tin 13 punto for di 7 wega. E golnan di FC Securitas Antias a keda di skor pa: Jean-Louis Fortin (2), Jourickmar Martina i Roderick Fraai. Jonathan Bicentini a salba honor pa Dòmi.
Ku e triunfo di 7-6 riba FC Sta Helena, e tim di Sta Rosa Stars a pasa pa okupá e di dos puesto riba di tabla di posishon den divishon B: 10 punto for di 7 enkuentro. Norvianel Naar i Suly Kentz kada un a hinka tres gol pa Sta Rosa, miéntras ku Cedricson Antonio a hinka 1. Pa FC Sta Helena e goleadónan tabata Gunnarson Schoop (2), Ashley Clementina (2), Jurian Macias Tenorio i Rayshanir Franca.
Mas aleu den divishon B e tim di Excellent a gana ku skor di 4-2 di FC Ocean View Elite, FC Babranis 02 a goleá FC Five Stars: 8-1. Fabarma FC a sufri un derota di 1-3 kontra FC Bandolino.