Liga Pariba, djadumingu 29 di aprel 2018, a gana pa di tres biaha kontra Liga Pabou den e seri di weganan den Senior division. Ku e triunfo aki e tim di Pariba a gana fuera dje seri tambe e derechi pa representá Kòrsou den kampionato regional.
E seri de weganan den Senior division a keda hungá den Tio Daou Ballpark na Nort Sapaté. E enkuentronan aki tambe a keda organisá pa e organisashon di Curaçao Little League.
Riba djabièrnè tabatin e promé wega entre Liga Pariba i Pabou. Esaki a resultá den un viktoria di 12-8 pa e selekshon di Pariba. Picher Shane Quant a gana e enkuentro, miéntras ku e mes i Cliyano Nahr a destaká na bate, kada un ku 1 hit den 1 turno. Picher Klevert Martina a sufri e derota, miéntras ku Kay-lan Nicasia a dal 3 hit den 4 turno na bate.
E seri di wega a sigui djasabra ku atrobe Luga Pariba ganando di Liga Pabou pèrtá: 7-6. Edmond Jops a resultá e picher ganadó, miéntras ku Shane Quant i Rajeev Klaber kada un a dal 2 hit den 3 turno na bate. Picher pèrdèdó tabata Arllison Rodriguez i Roangeraud Fraai tabata bon pa 1 hit den 1 turno.
Djaduingu Liga Pariba e seyá e viktoria dje seri ora ela gana ku skor di 6-2 di Pabou. Picher ganadó a resultá Jeon Martis i Yevganni Reinita a bati 2 hit den 2 turno. Je-Andrick Lourens tabata e picher pèrdèdó, miéntras ku Keiji Louren a dal 2 hit den 4 turno.
E selekshon di Liga Pariba ta representá Kòrsou den e próksimo kampionato regional. Porsierto ku esaki ta tumá lugá na Kòrsou mes entre 29 di yüni pa 8 di yüli.
