Sport.cw

Sponsored by

Sponsored by

Sponsored by

Jong Holland na promé luga

Jong Holland den wikènt a gana su di tres wega i asina mantené su invikto i alabes e promé lugá den Liga MCB. E tim trikolor a derotá Subt ku skor minimo akumalando asina su di 9 punto. Skèrpènè ta okupá e di dos lugá ku 7 punto i pues ainda ta invikto, despues di a triunfá ku skor di 4-1 riba Undeba.

Federashon Futbòl Kòrsou (FFK) a sigui den wikènt ku su kampionato den promé divishon, esta Liga MCB. Tabatin un total di 5 wega: 4 den Stadion Dr. Antoine Maduro i 1 den Stadion Ergilio Hato.

Skèrpènè a registrá djabièrnè e skor di mas grandi te ainda den e kompetensia. E tim kampion di Kòrsou a hinka 4 gol kontra di Undeba, derotando e orguyonan di Bándabou 4-1.

E triunfo riba Undeba ta e di dos viktoria den e kampionato pa Skèrpènè, ku awor tin 7 punto for di 3 wega. Anteriormente e tim kampion a gana ku 2-0 di Victory Boys i empatá 1-1 ku Inter Willemstad.

Otro tim ku tambe ta invikto ainda ta FC Sithoc. E tim kolegial a nota su di dos empate den e kampionato den Liga MCB, ora ku djasabra ela tablá 1-1 ku Centro Dominguito.

Ku e resultado ei awor FC Sithoc tin 5 punto for di 3 wega. E kolegialnan a gana anteriormente di Undeba ku skor di 3-1 i a empatá ku Subt: 1-1.

Mas aleu Victory Boys djadumingu a derotá Vesta ku skor di 2-0, miéntras ku un dia promé (djasabra) Inter Willemstad a logra un triunfo di 2-0 riba Centro Barber.

E kampionato den Liga MCB ta sigui djasabra awor ku 2 wega. Centro Barber i Undeba ta hunga kontra di otro den Stadion Ergilio Hato,

miéntras ku Subt i Vesta ta topa otro den Stadion Dr. Antoine Maduro. Tur dos wega ta kuminsá 8or di anochi.

Djadumingu tambe tin 2 wega. Jong Holland i Skèrpènè ta topa otro den Stadion Ergilio Hato, miéntras ku den Stadion Dr. Antoine Maduro tin e wega entre FC Sithc i Inter Willemstad. E weganan aki ta kuminsá 6or di atardi.

Entrada pa e weganan di Liga MCB Promé Divishon ta kosta 6 florin pa adulto, miéntras mucha di 6 pa 12 aña i tambe 60+ ta paga solamente 2,50.

Translate »