Matthew Sophia awe djarason 30 di yüni ta viaha pa Hulanda pa kompetí den algun kompetensia. E talentoso atleta por sierto den wikènt tras di lomba durante kampionato local di atletismo a registrá su tempu rèkòrt riba kareda ku opstakulo 110 meter. Tambe ela gana oro riba 200 meter.
Sophia atrobe por mira atras riba otro tremendo prestashon durante e kampionato lokal di atletismo. Federashon di atletismo di Kòrsou a organisá e kompetensia den Stadion Ergilio Hato.
Tabatin kompetensia den diferente disiplina riba djabièrnè i tambe djasabra. Atletanan dje diferente klupnan a sali kontra di otro den esakinan i nan a registrá 9 tempu i markanan nobo.
Un dje rèkòrtnan nobo tabata presisamente di Sophia. Ela klòk 13,15 sekònde riba kareda di 110 meter ku opstakulo. Fuera di ta e tempu mas rapido na Kòrsou, e ta tambe -aunke no ofisial- e mihó tempu den Reino Hulandes. Sinembargo e no ta konta komo un rèkòrt ofisial na Hulanda, pasobra Sophia a kore su só.
Por sierto ku pa motibu di falta di kompetensia riba e disiplina aki mes, Sophia ta viaha awe pa Hulanda. E ta bai entrená i tambe kompetí den algun torneo i kampionato.
Fuera dje rèkòrt lokal riba 110 meter ku opstakulo, tambe Sophia riba djasabra a gana e kareda riba distansia di 200 meter. Pues e por mira tras atrobe riba un tremendo prestashon riba otro kampionato di atletismo lokal.
Fuera di Sophia tambe a sobresalí den e kampionato di atletismo e atleta Zsa Zsa Frans. Ela klòk 9,36 sekònde riba 60 meter ku opstakulo den kategoria di edat di 15 aña. Asina ela kibra e rèkòrt bieu ku tabata riba number di Liana Diaoen. Tambe Frans a akumulá un total rèkort di 3954 den e disiplina heptathlon. Esaki ta un punto mas ku Nasya Ramirez a logra den pasado.
