Jong Holland ta e úniko tim ku te ainda no a pèrdè niun wega den Kaya 6 di Liga MCB promé divishon. Ela gana awe djarason, 21 di sèptèmber, su di tres wega derotando Centro Barber 2 pa 0. Jong Holland awor ta okupá su só e promé puesto ku 10 punto. Jong Colombia a sufri su promé derota pèrdiendo kontra di Inter Willemstad 3 pa 1.
Federashon Futbòl Kòrsou (FFK) a sigui awe ku e kompetensia den Kaya 6 di Liga MCB promé divishon. Tabatin tres wega simultaniamente kuminsando 6or di atardi.
Jong Holland i Centro Barber a topa otro den Stadion Rignaal Jean Francisca. Na di 10 minüt di wega e trikolornan a bai dilanti via di gol dje hungadó Daal. Na di 90+ minüt Martina a hinka su di 14 gol pa seya e viktoria na 2-0.
Inter Willemstad a propiná Jong Colombia su promé derota den Kaya 6, ganando ku skor di 3 pa 1. E wega aki a tuma lugá den Stadion Ergilio Hato. Leuteria na apenas di 3 minüt a pone Inter Willemstad dilanti. Pop na di 21 minüt a ampliá e skor i e wega a bai sosegá 2 pa 0.
Na di 77 minüt di wega Koeiman ta kòrta e ventaha pa Jong Colombia: 1-2. Sinembargo dos minüt despues Pop ta bolbe skor pa asina seyá e triunfo pa Inter Willemstad. Awor Pop tin 9 gol hinká den Liga MCB promé divishon e aña’ki.
Den e di tres wega ku a tuma lugá den Stadio Dr Antoine Maduro e tim di Skèrpènè a gana ku skor di 2 pa 1 di Centro Dominguito. Rocha Gomez na apenas 5 minüt a pone e tim di fraternan 1-0 dilanti. Boelijn sinku minüt despues, esta na di 10 minüt, a skor e di dos gol pa Skèrpènè: 2-0. Martha na di 62 minüt a hinka e úniko gol pa Centro Dominguito.
E resultadonan aki ta trese ku ne ku Jong Holland awor ta úniko invikto i sólido na promé puesto ku 10 punto for di kuater wega. E tim a gana tres biaha i empatá un wega. Jong Colombia ta okupá e di dos puesto ku 7 punto: dos triunfo, un empate i un derota. Skèrpènè i Inter Willemstad ku nan respektivo viktoria awe a subi bai kompartí e di tres lugá ku 5 punto: 1 triunfo, 2 empate i 1 derota.
Fotonan: Jacinto de Jesus
