Skèrpènè ayera djadumingu, 25 di sèptember, a propiná Jong Holland su promé derota den Kaya 6 di Liga MCB promé divisshon. E tim di pariba a gana ku skor di 3-1 pa asina sigurá su partisipashon den Kaya 4. Inter Willemstad tambe ta’den despues di a empatá 1-1 ku Centro Dominguito.
E kompetensia den Kaya 6 di Liga MCB promé divishon a finalisá ayera ku e ultimo seri di tres wega. Esakinan a tuma lugá pareu den Stadion Rignaal ‘Jean’ Franisca, Stadion Ergilio Hato i Stadion Dr. Antoine Maduro.
Jong Holland ku for di trempan a sigurá su klasifikashon pa Kaya 4, a sufri ayera su promé derota den Kaya 6. Skèrpènè den Stadion Ergilio Hato a gana dje tim Trikolor ku skor di 3-1.
Na di 20 minüt Moreno a skor e promé gol pa Skèrpènè i e mesun hungadó aki dos minüt despues a ampliá e skor na 2-0. Boelijn na di 57 minüt a hasi e wega 3-0. Pantophlet na di 64 minüt a skor e gol di honor pa Jong Holland.
Skèrpènè tabatin un mal komienso den Kaya 6, pèrdiendo un wega i tablando dos. Sinembargo e tim a rekuperá ganando su ultimo dos weganan pa asina klasifiká pa Kaya 4, okupando e di dos lugá ku 8 punto tras di Jong Holland ku 10 punto.
Otro tim ku a sigurá su klasifikashon pa Kaya 4 ayera tabata Inter Willemstad. E tim a wanta bon kontra Centro Dominguito ku tambe tabata buska su klasifikashon, pero tabatin ku gana si. E wega a terminá 1-1.
Centro Dominguito a pika 1-0 dilanti den Stadion Dr. Antoine Maduro via di gol di Justiana. Esaki tabata na di 21 minüt. E wega a bai sosegá ku e skor aki. Na di 52 minüt Leuteria a empatá e wega pa Inter Willemstad pa asina seyá e tim di Vredenberg i bisendario su klasifikashon pa Kaya 4. E resultado a nifiká tambe eleminashon di Centro Dominguito ku a kaba ku 4 punto, mientras Inter Willemstad a okupá di kuater lugá ku 6 punto.
Jong Colombia a pèrdè ku skor di 2-1 di Centro Barber. E wega’ki a tuma lugá den Stadion Rignaal ‘Jean’ Francisca. Ellensburg na di 23 minüt a skor e promé gol di Centro Barber. Un minüt promé ku sosiegu Hugo ta hasi e wega 2-0. Na di 66 minüt Elias ta hinka e úniko gol pa Jong Colombia.
E tim di Boca Samí aunke di a sufri su di dos derota siguí, tambe ta den Kaya 4 terminando na di tres lugá ku 7 punto. Centro Barber promé ku su wega di ayera a kai afó finalisando ku 5 punto.
Pues e kuater timnan den Kaya 4 ta Jong Holland, Skèrpènè, Jong Colombia i Inter Willemstad.
Foto: Jacinto de Jesus