Kòrsou a pèrdè un gran deportista i dirigente deportivo den persona di Philip ‘Lipo’ Elhage. E ta é arkitekto dje mundu di deporte lokal.
Lipo Elhage a laga su stèmpel i legado komo dosente di moveshon, hungadó i dirigente di beisbòl, direktor di Servisio di Deporte Kòrsou (Sedreko), presidente di Curaçao Baseball Development Foundation (CBDF) i di Tio Daou Ballpark i miembro di Salón di Fama di Deporte.
Komo hungadó di beisbòl di Sta Rosa Indians Lipo Elhage a haña e apodo di Montezuma, e indjan mayo. E tabata konosi pa su forsa den bateo i a fungi komo kètcher i primera base dje tim di pariba. Tambe ela figurá den selekshonnan di Antia.
Gran mayoria di personanan ku a haña lès di moveshon na skol serka Lipo Elhage, tabata yamele ‘Menér’. Esaki komo e tabata bria outoridat, pero semper amikal I alabes respetuoso ku tur alumno.
Komo direktor di Sedreko e tabata para pa desaroyo di tur ramo di deporte i tambe di deporte na skol. Un persona ku un tim di persona di konfiansa rondo di dje pa atende ku tur federashon deportivo na Kòrsou. Sin distinshon.
Despues komo skout, dirigente di beisbòl i tambe ligá ku Tio Daou Ballpark i CTDF, Lipo Elhage a sigui desaroyá struktura den su ramo di deporte stimá aki. Persona di karakter ku despues ku su amigu dft William Millerson a drenta, e ora ei a aseptá indukshon den Salón di Fama.
Menér, Montezuma, señor Elhage, Lipo… ku bo alma sosegá na pas!