Liga Pabou ku ta representando Kòrsou i Karibe den Senior League World Series 2023 a klasifiká ayera’nochi, djamars 1 ougùstùs, pa e final dje pul internashonal. Esaki tabata despues di a bati Australia ku skor di 10 pa 0.
Kontrali na e promé wega di Kòrsou ku a ganá den extra inen, ayera e tim a hunga bon riba tur tres linea. Picheo, bateo i defensa tabata tremendo i representashon di Australia no tabatin niun chèns.
Ku nan respektivo viktoria Kòrsou i Australia a sigui pa semifinal den e pul internashonal. E promé triunfo di Kòrsou tabata riba Hulanda ku skor di 16 pa 13, miéntras ku Australia a gana ku skor di 3 pa 1 dje representashon di Latino Amérika.
Ku su di dos viktoria ayera Kòrsou a pasa pa final den pul internashonal i ta warda awor riba su kontrinkante. E wega aki ta tuma lugá djabièrnè awor pa 4or di atardi. Kampion dje pul ta pasa pa e gran final dje Senior League World Series 2023 riba djasabra.