Kòrsou a pasa invikto pa e final dje kampionato di Eastern Caribbean Amateur Softball Confederation (ECASC) 2023. E selekshon a gana awe, djasabra 4 di mart, promé ku skor di 12 pa 0 di British Virgin Islands i despues ku 15 pa 1 di Sint Maarten. Pues Kòrsou a gana tur su sinku weganan.
E selekshon di Kòrsou sin mas ta faborito pa gana e kampionato. Den e sinku weganan e tim a skor 56 kareda i pèrmití 2 kareda só kontra. Ku otro palabra Kòrsou ta fuerte den tantu picheo komo bateo.
Den e wega kontra dje selekshon di British Virgin Islands picher Richelle van Gennip den kuater inen no a pèrmití niun hit. Ela ponchá 8 batiadó pa e di kuater triunfo di Kòrsou.
Anaïs Piar, Julisse Koffy, Thaima Maximiliana i Michenou Marselia a sobresalí na bate. Piar I Maximiliana kada un a dal 1 hit den 1 turno, esta 1-1. Marsela a bati 2 hit den 2 turno i asina sòru pa 5 dje karedanan di Kòrsou. Koffy tambe tabatin 2 hit pero den 3 turno.
Kòrsou den promé inen a skor 7 kareda i agregá 5 kareda den di dos inen pa su 12 karedanan. E selekshon a dal 9 hit.
Den e di dos wega di awe tampoko Kòrsou tabatin kompashon ku Sint Maarten. E tim a sali skor 7 kareda den promé inen. Den di tres inen tabatin 1 kareda mas i finalmente atrobe 7 kareda den di sinku inen. E úniko kareda di Sint Maarten tabata den promé inen.
Picher Suheidy Faneyt a gana e wega. Ela pèrmití 1 kareda riba 3 hit den e sinku inennan ku e tabata riba montíkulo. Ela duna 4 base por bola i a poncho 5 batiadó