E selekshon di Kòrsou den forma dramátiko a titulá kampion dje kampionato di Eastern Caribbean Amateur Softball Confederation (ECASC) 2023. Despues di tabata pèrdí 2 pa 0, Kòrsou a skor 1 kareda den di kuater inen i dos mas via di dos homerun solitario den di 5 inen pa konkistá e titulo: 3-2.
Kontrali na dos dia promé ku US Virgin Islands a pèrdè ku skor di 9-0 di Kòrsou, e tim anfitrion a bin awe djadumingo 5 di mart fuerte den e wega final. E tim ta skor dos kareda riba un hungada den kuadro, kaminda ku picher J’Dah Girigorie a hasi su máksimo esfuerso pero no a logra saka out.
E hóben picher despues di e dos karedanan ei den promé inen, a dominá e batiadónan di US Virgin Islands pa sobrá dje wega. Girigorie su dominio tabata total, ponchando 16 batiadó.
Miéntras ku Girigorie tabata tira ponche tras di otro, e tim di Kòrsou tabata purba na yega base pa skor. Un dje mihó oportunidatnan pa esaki tabata den di tres inen ku dos koredó na base i un out. Pero un fly pa primera base i un roletaso pa shortstop a kaba ku e menasa aki.
Den di kuater inen Kòrsou a bolbe ataká i asta a yena base. Pero e tim a skor solamente un kareda pa asina hasi e skor 2-1 na fabor di US Virgin Islands. Den di sinku inen e tim anfitrion tabatin ku para mira dos homerun solitario bòltu e skor: 3-2. Tabata Jandely Ricardo i Julisse Koffy ku tras di otro a bati e bala bai pèrdè den outfield.
Ku e ventaha chikí ei di 3 pa 2, picher J’Dah Girigorie a krese mas ainda riba montíkulo den e sobrá inennan di wega. Porsierto ku ela retirá e sigiuente nuebe batiadónan di US Virgin Islands pa asina guia Kòrsou na e titulo kampionil.
E selekshon di Kòrsou tabatin 3 kareda, 6 hit i 1 eror, miéntras ku US Virgin Islands a sali supkampion ku 2 kareda, 3 hit i e tim no a faya den su defense riba tereno.
Titulando kampion dje kampionato di Eastern Caribbean Amateur Softball Confederation (ECASC) 2023, Kòrsou a gana derecho pa kompetí den Weganan Sentro Amerikano i di Karibe (CAC). Esaki ta tuma lugá na El Salvador.
E seleskhon di sòfbòl di Kòrsou a konsistí dje sigieunte hungadónan: Thaima Maximilliana, Joanna Benita, Shurvienska Wawoe, J’Dah Girigorie, Joanni Benita, Julise Koffy, Michenou Marselia, Deidra Da Costa Gomez, Anais Piar, Ashanty Alexandre, Sovienca Calmera, Suheydy Faneyt, Richelle van Gennip, Karin Tuk i Jandely Ricardo.
Lennerth Angela a fungi komo mènedjer i e entrenadó prinsipal ta Evan Balentina, E otro entrenadónan ta Patrick Girigorie, Marvin Wijman i Emmerick Agata. E terapista fisiko ta Dianne Winklaar, miéntras ku Shurendley de Lima tabata hefe di delegashon. E selekshon tabata patrosiná pa MCB i FDOK.