E selekshon di futbòl di Kòrsou U20 ta kla pa su partisipashon den grupo C di Concacaf U20 Championship. E kompetensia pa hungadónan di 20 aña i mas yòn, ta ranka sali djamars aki, 18 di febrüari, den Stadion Ergilio Hato, Brievengat.
Fuera di Kòrsou, e selekshonnan di Guadeloupe, Belize i Saint-Martin tambe ta hunga den grupo C. Despues di djamars aki, tin wega riba dia 20 i 22 di febrüari tambe den Stadion Ergilio Hato. Tur dia tin dos enkuentro i entrada ta gratis.
Porsierto ku djabièrnè último gran parti di hungadónan di Kòrsou ku ta biba i hunga futbòl den eksterior, a pisa suela di Kòrsou. Esaki tabata den oranan di atardi. Nan a djòin ku hugandónan di klupnan lokal I a kuminsá entrená i prepará pa e seri di weganan.
E selekshon U20 di Kòrsou ta bou di direkshon di Raul Triana Gonzalez. Su asistentenan ta Johan de Jong i Pablo Alomá Mark ku ta e entrenadó di e porteronan. Komo masahista ta fungi Sherwin Inesia, miéntras Roderick Rojer ta esun enkargá ku e materialnan. Ramfis Filet ta e dòkter i e hefe di delegashon ta Hubert Isenia, ku ta miembro di direktiva di Federashon Futbòl Kòrsou (FFK).
E sigiuente hungadónan ta forma parti dje selekshon U20 di Kòrsou: Tyrik Bodak (PSV), Gedion Meridian (Fc Volendam), Rivano Stacie, Joel Thode (Vitesse), Jurendly Dovale (Subt), Tyrese Noslin (Almere City). Roshyon Anita (Centro Barber). Shiryson Albertus (Undeba), Luchently Vrutaal (Centro Barber), Johenry Lloyd (Hubentut Fortuna), Arenchelo Leito (PEC Zwolle), Urvin Lentini Caciano (Fc Emmen), Joshua Zimmerman (Almere City), Nathan Holder (Fc Utrecht), Rychaintelo Knoll (Feyenoord), Kurt De Palm (Hubentut Fortuna), Lixiangelo Martis (Hubentut Fortuna), Alrick Pantophlet (New Song), Rudian Luciana ( U.D. Tera Kòrá) i Kgevin Kook (Centro Barber).
E promé wega di Kòrsou ta djamars mitar di 8 di anochi kontra Saint-Martin. Mitar di 5 Guadeloupe ta hunga kontra di Belize.