Kòrsou a gana awe, djaweps 2 di mart, su di dos wega den e kampionato di Eastern Caribbean Amateur Softball Confederation (ECASC) 2023. E triunfo aki tabata riba e tim di Jamaica ku skor di 11 pa 0. Picher Richelle van Gennep tabata hèrmetiko riba montíkulo tirando ponche tras di otro, miéntras ku Anais Piar i Joanna Benita a sobresalí na bate, kada un ku 2 hit den 3 turno.
Meskos ku den e promé wega kontra di Aruba (9 pa 1), Kòrsou a tuma un ventaha komodo kontra di Jamaica. Porsierto ku Jamaica den su wega inaugural ayera a pèrdè ku skor di 20 pa 5 di US Virgin Islands.
Den dos wega Kòrsou a produsí 20 kareda i haña solamente 1 kontra. Pa kolmo esaki ta un kareda ku a skor riba un fayo den defense, kemen un kareda shushi kontra di J’Dah Girigorie den e promé kompromiso.
Awe djaweps picher Van Gennep a dominá e batiadónan di Jamaica ku relativo fasilidat. Ponche tabata kai pariba i pabou. Solamente tres batiadó a bati fly.
Na bate Van Gennep a haña tremendo sosten di prinsipalmente Anaïs Piar i Joanna Benita. Kada un a bati 2 hit den 3 turno. Mas aleu Deidra Da Costa Gomez, Ashanty Alexandre i Suheidy Faneyt tambe a sobresalí na bate. Ku nan hitnan nan a sòru hinka 6 dje 11 karedanan pa Kòrsou. Kada un tabata bon pa 2 kareda.
E siguiente wega di Kòrsou ta mañan djabièrnè 33 ddi mart. Esaki ta kuminsá 8or di anochi i ta kontra e selekshon di US Virgin Islands. E kampionato di ECASC 2023 porsierto ta tumando lugá na St. John, US Virgin Islands.
E selekshon ku gana e kompetensia di ECASC akí ta klasifiká pa e weganan Sentro Amérikano i di Karibe 2023, mihó konosí komo CAC. Esaki ta tumá lugá e aña’ki mes na El Salvador.
E seleskhon di sòfbòl di Kòrsou ta konsistí dje sigieunte hungadónan: Thaima Maximilliana, Joanna Benita, Shurvienska Wawoe, J’Dah Girigorie, Joanni Benita, Julise Koffy, Michenou Marselia, Deidra Da Costa Gomez, Anais Piar, Ashanty Alexandre, Sovienca Calmera, Suheydy Faneyt, Richelle van Gennip, Karin Tuk i Jandely Ricardo.
Lennerth Angela ta fungi komo mènedjer i e entrenadó prinsipal ta Evan Balentina, E otro entrenadónan ta Patrick Girigorie, Marvin Wijman i Emmerick Agata. Mas aleu a viaha komo terapista fisiko/masahista Dianne Winklaar, miéntras ku Shurendley de Lima ta hefe di delegashon.
