E seri di weganan entre Liga Pabou i Liga Pariba den Intermediate League, ta empatá na 3. Prinsipalmente Liga Pabou tabatin un tremendo wikènt tras di lomba ganando tres dje kuater enkuentronan.
Intermediate League ta kai bou dje organisashon Curaçao Little League. Den e liga ta hunga aktualmente un seri di enkuentro pa formashon di selekshon entre Liga Pariba i Liga Pabou.
Den e promé wikènt Liga Pariba a gana dos wega i tuma ventaha di 2-0. Riba djasabra 14 di aprel tabata Liga Pabou ku a gana dos wega i asina empatá e seri na 2. Liga Pariba djadumingo mainta a gana i asina bolbe bai dilanti (3-2), pero atardi Liga Pabou a triunfá pa atrobe empatá e seri: 3-3.
Liga Pabou djasabra a logra porsierto gana e weganan sin pèrmití kareda na Liga Pariba. E promé enkuentro a tèrminá 6-0. Picher ganadó tabata Keorden Leito, miéntras ku Kevian Liberia a bati 1 hit den 1 turno. D’sean Wederfoort a resultá e pichter pèrdèdó i Yardielo O’niel a dal 1 hit den 2 turno.
E di dos wega riba djasabra Liga Pabou a gana ku skor di 5-0. Joshua Leito tabata e hungadó prinsipal pa e selekshon aki. Ela resultá e picher ganadó, miéntras ku e mes a sali tambe mihó bateadó ku 2 hit den 2 turno. Picher pèrdèdó tabata Nair Jamanika, miéntras ku Rodmar Angela a dal 1 hit den 2 turno.
Liga Pariba despues dje dos derotanan riba djasabra, a gana djadumingu e promé wega ku skor di 10-7. E triunfo a bai pa picher Welton Lourens, miéntras ku tantu Justin Dambruck komo Tyree Valeriaan a bati 2 hit den 3 turno. Picher Mairoshendrick Martinus a sufri e derota i Joshua Leito atrobe tabata bon na bate ku 1 hit den 3 turno.
E di dos enkuentro atardi a tèrminá ku e mesun skor di 10-7 pero pa Liga Pabou. Virganttly Rifaela a resultá e picher ganadó i Mairoshendrick Martinus tabatin 2 hit den 2 turno. Pa Liga Pariba Nyzat Martins Pereira a bira e picher pèrdèdó, miéntras ku Tyree Valeriaan atrobe tabata kayente na bate ku 3 hit den 3 turno.
