Kansas City Royals a gana awe djadumingu den kontinuashon dje kompetensia den MLB ku skor di 4-0 di Detroit Tigers. E yu di Kòrsou Jonathan Schoop a sigui den slùm ora ela bolbe bai di 3-0 pa e Tigernan. Ayera djasabra tampoko ela dal hit (3-0), miéntras ku djabièrnè tambe ela bai di 4-0.
Ganando awe tambe e tim di Kansas City Royals a swip e tim di Schoop den e seri: 3-0. Esaki komo ku Tigers a pèrdè djasabra ku skor di 2-1, miéntras ku djabièrnè tambe e tim a sufri un derota di 6-2.
Schoop ku anteriormente tabata leshoná, no a logra di dal hit den niun dje weganan ei. E yu di Kòrsou awoki ta bati pa un average di .174. Esaki ta produkto di 12 hit den 69 turno na bate, entre nan un homerun ku porsierto ela bati djarason ei kontra di Pittsburgh Pirates.
Den e wega di awe djadumingu Schoop a fungi komo batiadó designá. E tabata di shete batiadó den e aliñashon di Tigers i a ponchá dos biaha. E echo ku e yu di Kòrsou tabata batiadó designá ta pasobra Miguel Cabrera a rekuperá di un leshon i a bolbe pa hunga na primera base.