Pichingolo Kia/Nissan a klasifiká ayera, djarason 11 di sèptèmber 2019, pa e tantisimo final di sòfbòl femenino dòbel A. Ela gana den èkstra inen ku skor pèrtá di 5-4 den un konfrontashon emoshonante dje aktual kampion Sta Rosa Angels Vanddis.
Direktiva di Curaçaose Softball Bond (CSB) por mira atras riba un eksitoso promé parti dje ‘play-off’ di sòfbòl femenino dòbel A i tambe klase A. Den klase superior e seri entre Sta Rosa Angels i Pichingolo a bai tres wega kompletu.
E eterno rivalnan di último tres añanan aki a trit e públiko amante di sòfbòl ku a haña kaminda pa Sabana Ballpark ayeranochi, un tremendo espektakulo. E play-off a kuminsá ku Sta Rosa Angels pikando dilanti pa despues Pichingolo empatá e seri na 1 viktoria pa banda.
E di tres i desisivo enkuentro a kana pareu den e promé parti. Pichingolo a sali skor 1 kareda den kabes dje promé inen. Sta Rosa Angels a empatá e skor den su di dos turno na bate. E wega e sigui empatá te den di seis inen, kaminda ku Sta Rosa a skor 1 kareda pa asina bai dilanti: 2-1.
Pichingolo sinembargo no a entregá i den di shete inen a empatá e wega na 2 kareda i asina forsa èkstra inen. Esaki a resultá un prolongashon emoshonante ku algun bon hugada di ambos tim. Tur dos ekipo a skor 1 kareda den di ocho inen: 3-3.
Den di nuebe inen Pichingolo ta skor 2 kareda i bai ariba 5-3. Sta Rosa Angels sinembargo no kier a entregá i a logra skor 1 kareda den bòm dje entrada aki, pero esaki no tabata sufisiente: 5-4 pa Pichingolo Kia/Nissan.
E wega a kuminsá ku Arnalda Margarita riba montíkulo pa Pichingolo. Ela bai sinku inen i a pèrmití 2 kareda riba 6 hit. Ela duna 2 base por bola i a ponchá 4 batiadó. E picher hulandes Shanna te Vrede a drenta di relevo den di seis inen i ku su estilo nobo di pichá a gana e wega pa Pichingolo. Durante 4 inen ela pèrmití 3 hit i 2 kareda reglamentario, miéntras ku ela duna 3 base por bola i ponchá 3 batiadó.
Anais Piar a tèrminá komo mihó batiadó pa Pichingolo Kia/Nissan. Ela bati 2 hit den 3 turno i ku su hitnan ela sòru pa 2 kareda i tambe e mes a skor dos biaha. Abigail Daal tambe a dal 2 hit pero den 4 turno na bate.
Pa Sta Rosa Angels picher habridó Leonella Elizabeth a pèrdè e wega. Ela tira nuebe inen i a pèrmití 4 kerada riba 8 hit. Ela duna no menos ku 7 base por bola i di otro banda a ponchá 8 batiadó. Su kolega di tim Suheydi Faneyt tabatin e mihó sifranan di bateo: 2 hit den 3 turno.
Ku e viktoria riba Sta Rosa Angels, Pichingolo a pasa dirèkt pa e gran final di sòfbòl femenino dòbel A. A aktual kampion, Sta Rosa Angels, awor tin ku bai hunga kontra di The Fighting Team den semi final. E seri aki ku ta kuminsá djasabra awor na Sabana Ballpark, tambe ta mihó di tres wega. E tim ganadó ta klasifiká pa hunga final kontra Pichingolo.
