Sport.cw

Sponsored by

Sponsored by

Sponsored by

Pichingolo ta protestá wega

E wega ku tabatin planiá pa awe nochi entre Pichingolo KIA/Nissan i The Fighting Team ta kanselá. E motibu dje kanselashon aki ta pasobra e tim di Pichingolo a anunsiá di ta protestá e wega di ayera kontra di Souax Gill Sport, ku a gana ku skor pèrtá di 9-8.

Curaçaose Softball Bond (CSB) a kontinuá ayera ku e play-off di sòfbòl AA den Sabana Ballpark. Esaki tabata e di tres i último wega dje seri entre Pichingolo ku ta aktual kampion i Souax ku a tèrminá e bueltanan preliminar na promé lugá. E timnan a gana i pèrdè di otro.

E ganadó dje enkuentro, pues e seri, lo a pasa dirèkt pa final. E pèrdèdó lo pasa pa hunga kontra The Fighting Team ku den tres wega a gana su seri kontra Fenix Softex pa disidí kua tim ta bira e otro finalista.

E promé dos inennan Pichingolo ni Souax bo a skor kareda. Den habrí di su di tres turno na bate, e aktual kampion a pika dilanti 1-0. Souax den será dje di kuater inen a bòltu e skor na su fabor (2-1) i ku 1 kareda mas den di sinku entrada a ampliá esaki na 3-1.

Den di seis entrada Pichingol a bin bèk i ku 7 kareda a tuma ventaha di 8-3 i hopi fanatiko a kere ku e aktual kampion ta bai gana. Den di dos mitar di mesun inen Souax sinembargo a skor 6 kareda i a bòltu e skor bèk: 9-8.

E di seis inen aki sinembargo tabatin un diskushon riba un hungadó di Souax di kua Pichingolo a protestá. Na e momento ei e tim di umpayer a dekretá un out na fabor di e aktual kampion, pasobra parse ku no a anunsiá dicho hungadó i tambe e lo no tabatin mag di bati na e momento ei tampoko.

Pichingolo sinembargo no a aseptá sin mas e solushon ei i direktiva dje klup a anunsiá di ta bai protestá mas aleu. Sport.cw a kompronde ku Pichingolo ta alegá ku e supuesto hungadó di Souax su nòmber ni ta aparesé mes riba lista di hungadónan dje tim pa hunga ayera.

Relashoná ku e anunsio di Pichingolo di ta protestá e wega, direktiva di CSB a disidi di para momentaniamente e weganan di play-off.

Translate »