Apesar ku Aytor Alberto a kaba wega ayera -djabieèrnè 12 di aprel 2019- komo ’topscorer’ ku 38 punto, e no por a evitá e derota di su tim Willemstad Warriors. Royal Hoops a gana ku skor di 70-65 i asina kibra invikto di Warriors den kategoria U20.
Curaçao Basketball Federation (Cubafe) a kontinuá ku e kompetensia den kategoria di 20 aña i mas hóben (U20) den sala Errol Rooi di Sentro Deportivo Kòrsou (SDK) na Brievengat. Tabatin dos enkuentro ku tabata hopi emoshonante.
Despues di a pèrdè su wega inougural dje kampionato nobo di Cubafe kontra di supkampion Janwe Spartacus, Royal Hoops a gana dos enkuentro siguí. E tim a superá promé Sharks i ayera pues Warriors, pa asina tambe kibra e ekipo aki su invikto i fòrsa un dòbel empate na promé puesto.
Un nota remarkabel ta ku Aytor Alberto di Warriors apesar dje promé derota di su tim, a sali atrobe ’topscorer’ dje enkuentro. E biaha’ki ela skor 38 punto ku ta un rèkòrt p’e temporada yòn aki. Awor e tin den e temporada nobo ya kaba 80 punto, loke ta un promedio di 26 punto pa wega.
Zion Constansia tabata e hungadó ku a skor mas tantu punto pa Royal Hoops: 15 punto. Ku e triunfo di 70-65 ayera e tim aki no solamente a kibra e invikto di Warriors, pero tambe a forsa un dòbel empate ku mesun ekipo na e di promé lugá riba e tabla di posishon. Tur dos ekipo tin awor 2 viktoria i 1 derota.
Den e otro wega di Cubafe den kategoria U20 ayeranochi, Janwe Spartacus a registrá su di dos viktoria di temporada i awor tin rèkòrt di 2 triunfo i 2 derota. E tim a gana ayera di Sharks ku skor di 66-61. Omar Henri a sobresalí pa Spartacus ku 29 punto, miéntras ku Ivan Martijn tabata esun ku a skor mas tantu pa Sharks: 19 punto.
Fuera di Sharks ayera, Janwe Spartacus a gana tambe di Curaçao Trotters i a pèrdè kontra di kampion Excel i Royal Hoops.
