Skèrpènè a gana tambe su di dos wega den Kaya 4 i asina pasa derechito pa e gran final di futbol Liga MCB. E tim di fraternan a gana ayera djasabra ku skor minimo di Inter Willemstad, bon pa 6 punto. Jong Holland i Vesta un dia promé a empatá na sero gol ku otro.
Federashon Futbòl di Kòrsou (FFK) aktualmente ta hungando e seri pa wak kua timnan ta pasa pa final. Tin kuater fecha di kompetensia tras di lomba. E weganan ta tuma lugá den Stadion Dr Antoine Maduro na Kinchan.
Djabièrnè Jong Holland i Vesta a parti punto ku otro. E wega’ki a tèrminá na 0 gol. E resultado ta nifiká ku e trikolornan awor tin 1 punto, miéntras ku Vesta tin 2 punto.
Skèrpène ayera djasabra ku gol di Maximiliano Ciarnello a derotá tambe Inter Willemstad. E gol tabata un pinaltí na di 48 minüt di wega. Anteriormente Skèrpènè a gana 2 pa nada di Jong Holland i ku e viktoria riba Inter Willemstad a pasa derechito pa e gran final di FFK.
Vesta ku tin 2 punto ta e próksimo kontrinkante di Skèrpènè. Si e tim di Buena Vista ke tin sigur di su pase pa final, e tin ku gana su wega ku ta programá pa djarason awor. Esaki ta tuma lugá riba fèlt di FFK na Brievengat.
Riba mesun djarason tin tambe e wega entre Inter Willemstad i Jong Holland den Stadion Dr. Antoine Maduro. Tur dos tim tin aktualmente 1 punto. Tur dos pues ta bai pa e viktoria i lo krusa dede pa Vesta empatá òf pèrdè kontra Skèrpènè, ya asina un di nan por drenta final di chiripa.
