Sport.cw

Sponsored by

Sponsored by

Sponsored by

Suffisant Eagles a gana pèrtá

Suffisant Eagles ayera a pika dilanti den e final di sòfbòl maskulino fast pitch. E tim a gana ku skor pèrtá di 11-10 di Dream Team. Jegveny Hendrik a sobresalí pa e ganadónan batiendo 3 hit di kua dos homerun, bon pa 4 kareda.

Curaçaose Softball Bond (CSB) a ranka sali ayera ku e promé wega dje di sòfbòl maskulino fast pitch. Esaki a tuma luga den Buena Vista Ballpark i ku live streaming di Sport.cw ku Xiomara de Windt-Rasmijn komo komentarista i Reynaldo Cashimiri komo naradó invitá.

Dream Team a kuminsá e wega ku 2 kareda den promé inen pa tuma ventaha. Suffisant Eagles ku un kareda den su di dos turno na bate a kòrtá esaki na 2-1. Tur dos tim a skor 1 kareda den tantu di tres komo di kuater inen i asina Dream Team a mantené su ventaha: 4-3.

Ku 3 kareda den su di sinku turno na bate Suffisant Eagles a bòltu e skor: 6-4. E alegria sinembargo tabata di korto durashon, pasobra Dream Team den kabes di seis inen a krusa platu 4 bia pa bolbe bai dilanti: 8-6.

Porsierto ku Suffisant Eagles den bòm di mesun seis inen a skor 5 kareda pa asina bolbe tuma ventaha: 11-8. Den su último turno na bate Dream Team a harmá un atake pero sinembargo ku solamente 2 kareda a keda kòrtiku pa asina pèrdè ku skor di 11-10.

E hòmber grandi pa Suffisant Eagles tabata Yegveny Hendrik ku a bati 3 hit den kuater turno na bate. Dos tabata homerun. Ela skor dos biaha i ku su hitnan yuda su tim ku 4 kareda. Ku e prestashon aki ela gana e premio di Player of the Game MCB/CSB.

Picher ganadó tabata Alexander Rodriguez ku den seis inen i un tersio a pèrmití 10 kareda riba 5 hit. Ela ponchá 7 batiadó i duna 3 base por bola. Julius Veeris a drenta di relevo den di shete inen pa asina salba e wega.

Picher Fransel Meyers ku a drenta di relevo den di sinku inen a pèrdè e wega pa Dream Team. Den dos inen di trabou ela pèrmití 5 kareda riba 5 hit. Wendly Serberie a habri riba montikulo i den 4 inen a pèrmití tambe 6 kareda riba 8 hit. Ela ponchá 6 batiadó.

E final ta sigui awe djasabra ku e di dos wega den Buena Vista Ballpark. E wega ta kuminsá shetor di anochi.

Translate »