Souax Gill’s Sport ayera a saka sla bèk riba The Finghting Team, ora ku ela gana 1 pa 0. Fuera ku Souax a laga e tim kontrali den tereno, ela forsa tambe un wega desisivo den e semi final di Liga MCB-CSB den sòfbòl femenino fast pitch.
E semi final a sigui den Sabana Ballpark. E fanatikonan ku a haña kaminda pa stadion di Richard ‘Chati’ Constancia tabata testigu di un tremendo wega.
Despues ku djadumingo The Fighting Team a laga Souax den tereno ku skor di 3 pa 2 pa asina pika dilanti den e seri di mihó di tres wega, Souax ayera a paga The Finghting Team ku mesun formula lagando esaki tambe den tereno ku skor minimo di 1 pa 0.
E di dos wega dje semi final entre e dos timnan a yega di shete inen empatá na 0 kareda. Den e último entrada aki Ivaniela Belfor ta bati hit pa left field i despues yega segunda base riba wild pitch. Despues Tanusi Delando ta bati roletaso pa short stop ku ta tira malu pa primera base i asina duna Melfor kore te home pa skor e úniko kareda dje wega i paga lus pa The Fighting Team.
Souax Gill’s Sport tabatin 1 kareda riba 3 hit i 2 eror. Picher ganadó tabata J’Dah Girigorie, miéntras ku Ivaniela Belfor tabatin un anochi perfekto na bate. Ela dal 2 hit den 2 turno (2-2)
Pa The Fighting Team 0 kareda, solamente 1 hit i 2 eror. Libis Hurtado Payares tabata e picher pèrdèdó. E hungadónan ku mihó bate tabata Sovienca Calmera i Gianinna Petrona. Tur dos a bati 1 hit den 3 turno (3-1).
E wega desisivo entre e dos timnan ta djabièrnè aki. Esaki ta tuma lugá den Sam Bunting Ballpark den Brievengat i ta kuminsá mitar di 8 anochi. Ganadó dje wega aki ta pasa pa final kontra di Pichingolo Nissan.
