Sport.cw

Sponsored by

Sponsored by

Sponsored by

Souax a gana Kopa Clovis

Souax Gill’s Sport a tèrminá komo kampion di temporada regular di sòfbòl femenino superior fast pitch. E tim a kaba na promé puesto ku 11 triunfo i 5 derota pa asina konkistá tambe e promé Kopa Clovis Lodewijks. Picher J’Dah Girigorie i kècher/outfielder Kimberley Agard, tur dos di Souax, a kaba ku mihó sifranan.

Direktiva di Curaçaose Softball Bond (CSB) presidí pa Edward ‘Chu’ Martis a konkluí e siman aki e bueltanan preleminar dje kampionato di sòfbòl femenino superior. E timnan a hunga den e temporada regular aki 16 wega.

Souax Gill’s Sport a gana 11 wega kontra 5 derota pa okupá e promé lugá riba tabla di posishon. Ku e prestashon aki tambe e tim a konkistá e promé Kopa Clovis Lodewijks ku direktiva di CSB a pone disponibel pa e mihó tim dje kampionato regular, esta dje bueltanan preleminar.

Ku 10 triunfo i 6 wega pèrdí Pichingolo Nissan a kaba na di dos puesto, siguí na di tres lugá pa The Fighting Team ku 9 wega ganá i 7 pèrdí. Na di kuater puesto tin Sta Rosa Angels Vanddis ku 6 viktoria i 10 derota, miéntras ku Fenix Softex kaba na di sinku luga ku 4 triunfo i e tim a pèrdè 12 biaha.

J’Dah Girigorie di Souax Gill’s Sport a tèrminá komo e mihó picher dje kampionato regular. Ela logra 8 triunfo kontra 2 derota. E tabatin un efektividat impreshonante di 1.80 na kareda limpi pèrmití. Den 58 inen ela tira 70 ponche.

Kimberley Agard tambe di Souax Gill’s Sport a sali e mihó batiadó dje kampionato regular ku un average impreshonante di 476 punto. Esaki ta produkto di 20 hit den 42 turno na bate. Agard ta kècher i tambe outfielder.

Tantu J’Dah Girigorie komo Kimberley Agard ta den selekshon di Kòrsou ku aktualmente ta preparando pa e kampionato Sur Amerikano

di sòfbòl. E kompetensia ta tuma lugá na Argentina. Dos aña pasá Kòrsou a bira kampion dje kampionato regional aki i pues awor tin ku defend’é e titulo kontra dje otro paisnan kontrinkante.

E selekshon di Kòrsou ta Sali dia 20 di oktober pa Argentina i ta regresá bèk dia 31 di oktober. Despues dje kompromiso internashonal aki, e kampionato lokal femenino superior ta kuminsá ku e weganan di play-off. Esaki ta planiá pa ranka sali riba 5 di novèmber.

Translate »