Souax Gill Sport ganando 7 pa 1 kontra Pichingolo Nissan a forsa e di kuater wega den final di sòfbòl femenino dòbel A. Apesar ku e tim ainda ta na bida, e ta ketu bai ku lomba kontra di muraya komo ku Pichingolo ta un paso for dje titulo kampionil.
Despues ku Souax Gill Sport a klasifiká na promé lugá den kampionato regular, ela pasa fasil pa final ganando di The Fighting Team. Pichingolo di su parti tabatin ku gana di Sta Rosa Angels Vanddis i despues tambe The Fighting Team pa yega final.
Despues di gana e promé dos weganan dje seri final, Souax a logra para e racha di Pichingolo den e post temporada. Hungadó mas balioso den e di tres wega aki tabata picher J’Dah Girigorie ku a sobresalí riba montikulo pa Souax.
Girigorie a haña bon sostén di su koleganan na bate ku den e promé dos inennan a hinka 5 kareda. Esaki tabata danki na batasonan di entre otro Eva Voortman, Rianthe Winklaar i Lyuska van ‘t Kruys. Finalmente Van ‘t Kruys i Thanysha Gil a tèrminá komo e mihó batiadónan di wega, kada un ku 2 hit den 3 turno (3-2).
Den e di tres wega di final picher Arnalda Margaritha no tabata por a kontené e ofensiva di Souax. Ela resultá e picher pèrdèdó, miéntras ku Rigmayra Poulina i Anais Piar tabata e mihó batiadónan pa Pichingolo Nissan. Kada un a bati di 3-2.
Souax Gill Sport tabatin 7 kareda riba 9 hit, miéntras ku e tim no a fildea perfecto: 0 eror. Pichingolo Nissan a skor 1 kareda riba 6 hit I tabatin 2 fayo den defense.
E final ta sigui djabirèrnè awor den Sam Bunting Ballpark. E di kuater wega ta kuminsá 8or.
