Souax Gill’s Sport mes ta hunga den final di sòfbòl fast pitch kontra Pichingolo Nissan. Esaki ta e desishon despues ku komishon di protesta di Curaçaose Softball Bond (CSB) a rechasá e protesta di The Fighting Team. E promé wega final ta djabièrnè aki, 19 di novèmber 2021.
Anteriormente Souax Gill’s Sport a gana e semi final pa asina klasifiká pa final. The Fighting Team sinembargo a protestá e wega desisivo aki, alegando ku Souax a uza mas hungadó di klase A ku e kantidat di 6 ku ta pèrmití.
Dor dje protesta ei, direktiva di CSB a posponé e apertura dje seru final pa 1 siman. Entre tantu tabatin un reunion general kaminda ku a instalá un komishon pa atende e protesta. E komishon entre tantu a rechasá e protesta di The Fighting Team i asina tòg Souax Gill’s Sport mes ta bai hunga kontra Pichingolo Nissan.
E final ta konsistí di un seri ‘best of five’. Esaki ta nifiká ku e tim ku gana 3 wega ta bira kampion di sòfbòl femenino fast pitch di Kòrsou, esta klase dòbel A.
E promé wega ta planiá djabièrnè aki den Sam Bunting Ballpark den Brievengat. E di dos wega ta tuma lugá djasabra den Sabana Ballpark na Noord Zapateer, miéntras ku e di tres wega ta atrobe den Sam Bunting Ballpark. Tur e weganan ta kuminsá mitar di 8 di anochi.
