Treasure New Era tin awor kuater triunfo sin derota. Den wikènt e tim a bolbe gana dos enkuentro i awor ta komandá e tabla di posishon den All Star Softball League.
Den e di dos wikènt di kompetensia den All Star Softball League tabatin kuater wega den Frank Curiel Ballpark. E liga aki ta pa sòfbolistanan veterano di kua vários den pasado a hunga den divishon máksimo di Curaçaosche Softball Bond (CSB).
Despues ku den e promé wikènt dje kompetensia nobo Treasure New Era a gana su dos weganan kontra di The Fighter, e wikènt aki e ekipo a superá The New Warrios tambe na dos okashon. E supkampion di All Star Softball League a skor total 28 kareda i risibi solamente 5 kontra.
Treasure New Era a gana djabièrnè ku skor di 11-5. Picher Carine Fluonia a bolbe registrá un viktoria, miéntras ku Judeska Kastaneer a bati 1 hit den 1 turno na bate: 1-1. Picher Churmalyn Eduarda di The New Warriors a pèrdè e wega i Jadira Hellement a sali mihó bateadó dje enkuentro ku 2 hit den 2 turno (2-2). Pa Treasure New Era: 11 kareda, 14 hit i 4 eror. The New Warriors: 5 kareda, 9 hit i tambe 4 eror.
E di dos wega entre e mesun timnan a tèrminá ku skor di 17-0 pa Treasure New Era. Minerva Maduro a sali picher ganadó, miéntras ku Solange Soliana i atrobe Judeska Kastaneer tabata perfekto na bate. Tur dos a dal 3 hit den 3 turno: 3-3. Picher Marin Windster a sufri e derota pa New Warriors i mihó bateadónan tabata mesun Marin Windster i Adicela Sedney. Tur dos tabata bon pa 1 hit den 1 turno, esta 1-1. Pa Treasure New Era: 17 kareda, 19 hit i 0 eror. The New Warriors: 0 kareda, 4 hit i 2 eror.
Despues ku den e promé wikènt dje kompetensia den All Star Softball League The Fighter a pèrdè su dos weganan kontra di Treasure New Era, e wikènt aki ela gana su promé dos weganan. E tim a superá Lady G ku skornan di 21-4 (djabièrnè) i 3-0 (djasabra).
Picher Sevilla Martina a gana e enkuentro djabièrnè. Lisette Hooi tabatin un anochi perfekto na bate ku 4 hit den 4 turno (4-4). Solange Martina tabata e picher pèrdèdó, miéntras ku Suyenne Otto a bati 2 hit den 2 turno (2-2). E sifranan di The Fighter tabata: 21 kareda, 21 hit i 0 eror; Lady G tabatin 4 kareda, 6 hit i 4 eror.
E wega di djasabra Angeledwina Sambo a sali picher ganadó. Solange Alberto a sali mihó bateadó ku 2 hit den 2 turno (2-2). Pa Lady G picher Suyenne Otto a pèrdè e wega, miéntras ku Dianella Joseph a dal tambe 2 hit den 2 turno (2-2). Pa The Fighter 3 kareda, 5 hit i 0 eror i pa Lady G 0 kareda, 5 hit i 1 eror.
