E seri entre seis tim den Liga MCB ta kla pa ranka sali djabièrnè 14 di ougustus. Randel Winklaar a términá komo goliadó maksimo ku 18 gol, pero tòg su ekipo Centro Dominguito no a logra klasifiká.

E seis klupnan ku a pasa pa Kaya 6 ta: Jong Holland, Skèrpènè, Centro Social Deportivo Barber, Inter Willemstad, Sport Vereiniging Vriendschap Eendracht Sterken Tegen Alles (SV Vesta) i Union Deportivo Báandabou (Undeba).

Den e kompetensia preliminar kada tim a hunga 18 wega. Esakinan a tuma lugá den Stadion Ergilio Hato na Brievengat i tambe Stadion Dr Antoine Maduro na Kintjan. E kampionato a para algun siman tambe pa motibu di Covid-19.

Por sierto ku e último dos weganan dje kampionato regular tabata desisivo pa posishon final i alabes klasifikashon pa Kaya 6 di dos tim: Undeba i Centro Dominguito. Undeba a tabla na 0 gol ku Jong Holland, miéntras ku Centro Dominguito a gana ku skor di 3-1 di SV Vesta. Ambos wega a tuma lugá djaweps último.

Apesar ku Centro Dominguito a gana, e tim a kai for di klasifikashon pasobra Undeba a saka un punto foi su wega i a tèrminá ku 1 punto mas ku Centro Dominguito.

Jong Holland a kaba na kabes ku 42 punto, siguí na di dos puesto pa Skèrpènè ku 34 punto, Centro Barber 32, Inter Willemstad i SV Vesta kada un ku 30 punto i Undeba ku 27 punto.

Winklaar di Centro Dominguito ta e hungadó ku mas tantu gol dje bueltanan preliminar ku 18 gol. Gersinio Constancia i Davidson Rosa, tur dos di Inter Willemstad, a kaba na di dos puesto empatá ku 13 gol. 000000000